გაეროს უშიშროების საბჭომ სირიის საკითხზე შეთანხმებას ვერ მიაღწია.

უშიშროების საბჭოს საგანგებო სხდომა, რომელიც ბოლივიის ინიციატივით, სირიაში აშშ-ის სარაკეტო დარტყმების გამო მოიწვიეს, მოსკოვის და ვაშინგტონის ურთიერთბრალდებების ფონზე გაიმართა.

„ამერიკა მიაღწევს იმას, რომ ასადმა ქიმური იარაღი აღარ გამოიყენოს“-განაცხადა გაეროში აშშ-ის მუდმივმა წარმომადგენელმა ნიკი ჰეილიმ.

“ქიმიური იარაღის გამოყენების და გავრცელების აღმოფხვრა აშშ-ის ეროვნული ინტერესების განუყოფელი ნაწილია. ჩვენ მზად ვართ მეტი გავაკეთოთ, თუმცა იმედი გვაქვს,რომ ეს საჭირო არ გახდება” - დასძინა ჰეილიმ.

მან ასადის მხარდაჭერისთვის რუსეთი და ირანი გააკრიტიკა და დასაძინა, რომ “ასადის რეჟიმის გაძლიერება მსოფლიოს ახალ მკვლელობამდე მიიყვანს.“

გაეროს უშიშროების საბჭოში რუსეთის წარმომადგენელმა ვლადიმერ საფრონკოვმა კი აშშ-ის ქმედებებს უკანონო უწოდა და განაცხადა, რომ ასეთი იერიშები ტერორისტების ინტერესებში შედის.

„თქვენი ცალმხრივი ქმედებები საშინელ ტრაგედიას გამოიწვევს“- განაცხადა საფრონკოვმა.

დიდი ბრიტანეთის წარმომადგენელმა მეტიუ მაიკროფტმა აშშ-ის დარტყმებს „გაუაზრებელ აქტზე პროპორციული პასუხი“ უწოდა.

სირიაში მიმდინარე სამოქალაქო ომის დაწყებიდან ექვსი წლის შემდეგ, აშშ-მ პირველი პირდაპირი იერიში მიიტანა სირიის სამთავრობო ძალების პოზიციებზე.

სირიაში, ჰომსის პროვინციაში წერტილოვანი დარტყმები ალ შარიათის სამხედრო ბაზაზე განხორციელდა, საიდანაც სავარაუდოდ ქიმიური თავდასხმა მოხდა. აშშ-მა ავიაიერიშები ხმელთაშუა ზღვაში ორი გემიდან განხორციელა და 59 შორი რადიუსის რაკეტა გამოიყენა.

ოფიციალურმა ვაშინგტონმა იერიში მას შემდეგ განახორციელა, რაც 4 აპრილს, სირიის ჩრდილო დასავლეთში, იდლიბის ქალაქ ხან-შეიხუნში, რომლებსაც ამბოხებულები აკონტროლებენ ქიმიური იარაღით თავდასხმა მოხდა, რომელშიც ბაშარ ალ ასადის რეჟიმს ადანაშაულებენ. შემთხვევას 89 ადამიანი ემსხვერპლა. დაშავებულია 500-ზე მეტი ადამიანი. დაღუპულთა შორის 33 ბავშვი და 18 ქალია. თავდასხმის შედეგების ამსახველი შემზარავი კადრები ინტერნეტში გავრცელდა.

მსოფლიო ლიდერებმა აშშ-ის გადაწყვეტილებას სრული მხარდაჭერა გამოუცხადეს. სირიის სამხედრო ბაზაზე სარაკეტი იერიში მხოლოდ რუსეთმა და ირანმა დაგმეს. რუსეთის პრეზიდენტმა ვლადიმირ პუტინმა აშშ-ის მიერ სირიაზე განხორციელებულ სარაკეტო იერიშს "სუვერენული სახელმწიფოს წინააღმდეგ აგრესია" უწოდა. რუსეთის საგარეო უწყებამ განცხადებაც გაავრცელა, რომელშიც ნათქვამია, რომ ეს „სუვერენული სირიისადმი აგრესიის ნათელი აქტია“, რომელიც ვაშინგტონს წინასწარ ჰქონდა მომზადებული.