სირიის არმია : აშშ-ს მიერ განხორციელებული საჰაერო დარტყმების შედეგად 6 ადამიანი დაიღუპა

მსოფლიო - 13:41, 07 Apr, 2017

7722

სირიის არმიის განცხადებით, აშშ-ის მიერ ალ შარიათის სამხედრო ბაზაზე სარაკეტო იერიშს მინიმუმ 6 ადამიანი ემსხვერპლა. მათი თქმით, დიდია მატერიალური ზარალიც. განადგურებულია 9 სამხედრო თვითმფრინავიც.

განცხადებაში აღნიშნულია ისიც, რომ "სირიის მთავრობა განაგრძობს ტერორიზმთან ბრძოლას, რათა მშვიდობა და უსაფრთხოება აღდგეს ყველა სირიელისთვის".

შეგახსენებთ, სირიაში, ქიმიური თავდასხმის საპასუხოდ, ამერიკის შეერთებულმა შტატებმა ასადის რეჟიმზე პირდაპირი სამხედრო იერიში მიიტანა.

სირიაში მიმდინარე სამოქალაქო ომის დაწყებიდან ექვსი წლის შემდეგ, აშშ-მ პირველი პირდაპირი იერიში მიიტანა სირიის სამთავრობო ძალების პოზიციებზე.

წერტილოვანი დარტყმები სირიაში, ჰომსის პროვინციაში, ალ შარიათის სამხედრო ბაზაზე განხორციელდა, საიდანაც ქიმიური თავდასხმა მოხდა. ავიაიერიშები ხმელთაშუა ზღვაში ორი გემიდან განხორციელდა. ოფიციალურმა ვაშინგტონმა იერიში მას შემდეგ განახორციელა, რაც იდლიბის პროვინციაში, ქიმიურ თავდასხმას 86-დან 100-მდე ადამიანი ესმხვერპლა.

აშშ-მა 59 შორი რადიუსის რაკეტა გამოიყენა.

აშშ-ის ქმედებას სრული მხარდაჭერა გამოუცხადა დიდი ბრიტანეთის, ისრაელის, ავსტრალიის, საფრანგეთის,პოლონეთის, თურქეთის, საუდის არაბეთის მთავრობებმა, ევროპული საბჭოს პრეზიდენტმა დონალდ ტუსკმა. ნატომ და საფრანგეთმა კი განაცხადეს, რომ ავიაიერიშის შესახებ ინფორმირებულები იყვნენ.

რუსეთის პრეზიდენტმა ვლადიმირ პუტინმა კი აშშ-ის მიერ სირიაზე განხორციელებულ სარაკეტო იერიშს "სუვერენული სახელმწიფოს წინააღმდეგ აგრესია" უწოდა.

შეგახსენებთ, სამშაბათს 4 აპრილს, სირიის ჩრდილო დასავლეთში, იდლიბის ქალაქ ხან-შეიხუნში, რომლებსაც ამბოხებულები აკონტროლებენ ქიმიური იარაღით თავდასხმა მოხდა, რომელშიც ბაშარ ალ ასადის რეჟიმს ადანაშაულებენ.

ადგილობრივი მედიის ცნობით დაღუპულთა რაოდენობა 86-დან 100-მდეა, დაშავებულია 500-ზე მეტი ადამიანი. დაღუპულთა შორის ათეულობით ბავშვია.

თავდასხმის შედეგების ამსახველი შემზარავი კადრები ინტერნეტში გავრცელდა.

პენტაგონის განცხადებით, ავიაიერიშის მიზანი ალ შარიათის სამხედრო ბაზის ინფრასტრუქტურის განადგურება იყო.