სირიაზე სარაკეტო იერიშის შესახებ იენს სტოლტენბერგი წინასწარ იყო ინფორმირებული

სირიაზე სარაკეტო იერიშის შესახებ იენს სტოლტენბერგი წინასწარ იყო ინფორმირებული - ნატო

მსოფლიო - 12:32, 07 Apr, 2017

2436

ნატოს ოფიციალური წარმომადგენლის განცხადებით, ალიანსის გენერალურ მდივანს იენს სტოლტენბერგს, სირიის წინააღმდეგ დაგეგმილი სარაკეტო დარტყმის შესახებ ინფორმაცია, აშშ-ის თავდაცვის მდივანმა ჯეიმს მატისმა წინასწარ მიაწოდა. ამის შესახებ ინფორმაციას CNN ავრცელებს.

„ჩვენ შეგვიძლია გაცნობოთ და დაგიდასტუროთ, რომ ნატოს გენერალური მდივანი ამ სარაკეტო დარტყმის შესახებ წინასწარ იყო ინფორმირებული. მას ამის შესახებ ინფორმაცია აშშ-ის თავდაცვის მდივანმა მიაწოდა“ - განუცხადა ნატოს წარმომადგენელმა CNN-ს.

შეგახსენებთ, სირიაში, ქიმიური თავდასხმის საპაუსუხოდ, ამერიკის შეერთებულმა შტატებმა ასადის რეჟიმზე პირდაპირი სამხედრო იერიში მიიტანა. აშშ-მა რამდენიმე საათის წინ 59 შორი რადიუსის რაკეტა გამოიყენა.

აშშ-ის ქმედებას სრული მხარდაჭერა გამოუცხადა დიდი ბრიტანეთის, ისრაელის, ავსტრალიის, საფრანგეთის,პოლონეთის, თურქეთის, საუდის არაბეთის მთავრობებმა.

ტრმაპის განცხადებით, წერტილოვანი დარტყმები სირიაში, ჰომსის პროვინციაში იმ სამხედრო ბაზაზე განხორციელდა, საიდანაც ქიმიური თავდასხმა მოხდა. ავიაიერიშები ხმელთაშუა ზღვაში ორი გემიდან განხორციელდა. ოფიციალურმა ვაშინგტონმა იერიში მას შემდეგ განახორციელა, რაც იდლიბის პროვინციაში, სავარაუდოდ ქიმიურ თავდასხმას 86-დან 100-მდე ადამიანი ესმხვერპლა.

შეგახსენებთ, სამშაბათს 4 აპრილს, სირიის ჩრდილო დასავლეთში, იდლიბის ქალაქ ხან-შეიხუნში, რომლებსაც ამბოხებულები აკონტროლებენ ქიმიური იარაღით თავდასხმა მოხდა, რომელშიც ბაშარ ალ ასადის რეჟიმს ადანაშაულებენ.

ადგილობრივი მედიის ცნობით დაღუპულთა რაოდენობა 86-დან 100-მდეა, დაშავებულია 500-ზე მეტი ადამიანი. დაღუპულთა შორის ათეულობით ბავშვია.

ინტერნეტში შემზარავი კადრები გავრცელდა. ვიდეოში ჩანან ადამიანები, რომლებიც მიწაზე წვანან, იკრუნჩხებიან და პირიდან ქაფი სდით. ასევე ადამიანები, რომლებიც უკვე უგონო მდგომარეობაში იმყოფებიან. ეს სიმპტომები აახასიათებს ქიმიური თავდასხმის იარაღის მოქმედებას.