სირიელი ბავშვები, იდლიბის ქალაქ ხან-შეიხუნში ქიმიურ თავდასხმაზე საერთაშორისო საზოგადოების დუმილსა და უმოქმედობას აპროტესტებენ.

სოციალურ ქსელში იდლიბში გადაღებული ფოტოები გავრცელდა, რომელზეც ასახულნი არიან სირიელი ბავშვები, რომლებიც მათი თანატოლების „ცხედრებთან“ დგანან.

ერთ-ერთ გოგონას ხელში ტრანსფარანტი უჭირავს წარწერით - „სირიის მეგობრები“, დანარჩენებს კი იმ ქვეყნების დროშები, რომლებიც სირიის ოპოზიციას უჭერენ მხარს.

ფოტოები ჰუმანიტარული დახმარების აქტივისტები ავრცელებენ.

ინტერნეტში კადრებიც გამოჩნდა, სადაც ასახულია, როგორ გლოვობს მამა თავის 9 თვის ტყუპ შვილებს.

შეგახსენებთ, სამშაბათს 4 აპრილს, სირიის ჩრდილო დასავლეთში, იდლიბის ქალაქ ხან-შეიხუნში, რომლებსაც ამბოხებულები აკონტროლებენ ქიმიური იარაღით თავდასხმა მოხდა, რომელშიც ბაშარ ალ ასადის რეჟიმს ადანაშაულებენ.

ადგილობრივი მედიის ცნობით დაღუპულთა რაოდენობა 86-დან 100-მდეა, დაშავებულია 500-ზე მეტი ადამიანი. დაღუპულთა შორის ათეულობით ბავშვია.

ინტერნეტში შემზარავი კადრები გავრცელდა. ვიდეოში ჩანან ადამიანები, რომლებიც მიწაზე წვანან, იკრუნჩხებიან და პირიდან ქაფი სდით. ასევე ადამიანები, რომლებიც უკვე უგონო მდგომარეობაში იმყოფებიან. ეს სიმპტომები აახასიათებს ქიმიური თავდასხმის იარაღის მოქმედებას.

მსგავსი მოვლენები განვითარდა 2013 წლის აგვისტოში დამასკოს გარეუბანშიც, ამ ზონის დაბომბვის დროს გამოყენებული იქნა ჭურვები, რომელიც ქიმიური ნივთიერება ზარინით იყო სავსე. მაშინ ქიმიურმა თავდასხმამ 300 დან 1500 მდე ადამიანის სიკვდილი გამოიწვია.

გაეროს უშიშროების საბჭოში უკვე შევიდა რეზოლუციის პროექტი, რომელიც იდლიბის იერიშს გმობს, თუმცა რუსეთი დოკუმენტის დაბლოკვით იმუქრება.