პეტერბურგის მეტროსადგურებში ორივე ბომბი თვითმკვლელმა ტერორისტმა დატოვა

მსოფლიო - 18:19, 04 Apr, 2017

4822

რუსეთის საგამოძიებო კომიტეტის განცხადებით, სანკტ-პეტერბურგის მეტროში ტერაქტი იმ პირმა განახორციელა, რომელმაც მეტროსადგურ „ამბოხების მოედანზე“ ბომბი დატოვა.

„გენეტიკურმა ექსპერტიზამ და სათვალთავლო კამერებმა გამომძიებლებს იმის თქმის საფუძველი მისცა, რომ „ამბოხების მოედანზე“ ბომბი იმ მამაკაცმა დატოვა, რომელმაც ვაგონში აფეთქება მოაწყო“ - აცხადებენ უწყებაში.

რუსეთის საგამოძიებო კომიტეტმა დაადასტურა ყირგიზეთის ეროვნული უსაფრთხოების სახელმწიფო კომიტეტის მიერ გავრცელებული ინფორმცია, რომ სანკტ-პეტერბურგის მეტროში ტერაქტის შემსრულებელი 1995 წელს ყირგიზეთში დაბადებული, 22 წლის რუსეთის მოქალაქე, აკბარჟონ ჯალილოვია.

რამდენიმე საათის წინ, უწყების სპეციალურმა წარმომადგენლმა სვეტლანა პეტრონკომ განაცხადა, რომ ნაპოვნია იმ პირის ცხედარი, რომელმაც სანკტ-პეტერბურგის მეტროპოლიტენში სავარაუდოდ აფეთქება განახორციელა.

მისი თქმით, მამაკაცის ვინაობა დადგენილია, თუმცა გამოძიების ინტერესებიდან გამომდინარე, არ გასაჯაროვდება.

შეგახსენებთ, 3 აპრილს, მოსკოვის დროით 14:30-ზე სანკტ პეტერბურგის მეტროსადგურებს "Сенная площадь" და "Технологический институт-2"-ს შორის აფეთქება მოძრავ მატარებელში მოხდა, რომელმაც 14 ადამიანის სიცოცხლე იმსხვერპლა , 51 კი დაშავდა.

მოგვიანებით, პოლიციამ მეტროსადგურ „ამბოხების მოედანზე“ აუფეთქებელი ბომბი იპოვა.

რუსეთის ქალაქებში უსაფრთხოების ზომები გაძლიერებულია. სანკტ-პეტერბურგის ხელისუფლებამ მეტროში მომხდარი აფეთქების გამო სამდღიანი გლოვა გამოაცხადა.