რუსეთის საგარეო საქმეთა მინისტრმა სერგეი ლავროვმა სანკტ-პეტერბურგში გუშინ მომხდარი ტერაქტის შესახებ კომენტარი გააკეთა. მან მედიის მიმოხილვას იმის შესახებ, რომ ტერაქტი სანკტ-პეტერბურგის მეტროში არის შურისძიება მოსკოვის ქმედებების გამო სირიაში, ცინიკური და დამცინავი უწოდა.

ლავროვის განცხადებით ტერორისტებსა და ტერორიზმს ეროვნება არ გააჩნია:

„დაუშვებელია კავშირის ძიება ადამიანის წარმოშობასა და მის რელიგიურ მისწრაფებებს შორის. ტერორიზმი - ეს არის დანაშაული მთელი კაცობრიობისა და ყველა რელიგიის წინააღმდეგ. სხვადასხვა მედიასაშუალებების მიერ იმის განხილვა, რომ ტერაქტი, ეს არის სირიაში ჩვენი პოლიტიკის წინააღმდეგ მიმართული შურისძიება, ცინიკური და დამცინავია“, - განაცხადა სერგეი ლავროვმა.

შეგახსენებთ, გუშინ, მოსკოვის დროით 14:30-ზე სანკტ პეტერბურგის მეტროსადგურებს "Сенная площадь" და "Технологический институт-2"-ს შორის აფეთქება მოძრავ მატარებელში მოხდა, რომელმაც 14 ადამიანის სიცოცხლე იმსხვერპლა , 51 კი დაშავდა.

მოგვიანებით, პოლიციამ მეტროსადგურ „ამბოხების მოედანზე“ აუფეთქებელი ბომბი იპოვა.

ამასთანავე ცნობილი ხდება რომ საგამოძიებო ორგანომ ძებნა გამოაცხადა ორ პირზე. ერთი, რომელმაც ვაგონში ასაფეთქებელი მოწყობილობა აამოქმედა და მეორე, რომელმაც სანკტ-პეტერბურგის კიდევ ერთ მეტროსადგურში დატოვა ბომბი, რომელიც საბოლოოდ არ აფეთქდა.

რუსეთის ქალაქებში უსაფრთხოების ზომები გაძლიერებულია. სანკტ-პეტერბურგის ხელისუფლებამ მეტროში მომხდარი აფეთქების გამო სამდღიანი გლოვა გამოაცხადა.