რუსული მედია ტერაქტის სავარაუდო შემსრულებლის ფოტოს ავრცელებს

მსოფლიო - 13:51, 04 Apr, 2017

4304

რუსული მედია სანკტ-პეტერბურგის მეტროში მომხდარი ტერაქტის შემსრულებლის ფოტოს ავრცელებს.
ყირგიზეთის ეროვნული უსაფრთხოების სახელმწიფო კომიტეტმა დაადასტურა, რომ ტერაქტის შემსრულებელი 1995 წელს ყირგიზეთში დაბადებული, 22 წლის რუსეთის მოქალაქე, აკბარჟონ ჯალილოვია.

ადრე გავრცელდა ინფორმაცია, რომ პეტერბურგის მეტროში ტერორისტული აქტი ყირგიზეთის მოქალაქემ, მაკსიმ ვიტალიევიჩმა განახორციელა, რაც უშიშროების სამსახურმა არ დაადასტურა. უწყებაში განაცხადეს, მას შემდეგ რაც ვიტალიევიჩის ფოტო ინტერნეტში გავრცელდა, ის სამართალდამცებთან თავად მივიდა და განუცხადა, რომ აფეთქებასთან კავშირი არ აქვს.

შეგახსენებთ, გუშინ, მოსკოვის დროით 14:30-ზე სანკტ პეტერბურგის მეტროსადგურებს "Сенная площадь" და "Технологический институт-2"-ს შორის აფეთქება მოძრავ მატარებელში მოხდა, რომელმაც 14 ადამიანის სიცოცხლე იმსხვერპლა , 51 კი დაშავდა.

მოგვიანებით, პოლიციამ მეტროსადგურ „ამბოხების მოედანზე“ აუფეთქებელი ბომბი იპოვა.

ამასთანავე ცნობილი ხდება რომ საგამოძიებო ორგანომ ძებნა გამოაცხადა ორ პირზე. ერთი, რომელმაც ვაგონში ასაფეთქებელი მოწყობილობა აამოქმედა და მეორე, რომელმაც სანკტ-პეტერბურგის კიდევ ერთ მეტროსადგურში დატოვა ბომბი, რომელიც საბოლოოდ არ აფეთქდა.

რუსეთის ქალაქებში უსაფრთხოების ზომები გაძლიერებულია. სანკტ-პეტერბურგის ხელისუფლებამ მეტროში მომხდარი აფეთქების გამო სამდღიანი გლოვა გამოაცხადა.