დონალდ ტრამპმა პუტინს დაურეკა და სანკტ-პეტერბურგის ტერაქტის გამოძიებაში მხარდაჭერა გამოუცხადა

მსოფლიო - 10:40, 04 Apr, 2017

2336

აშშ-ის პრეზიდენტმა დონალდ ტრამპმა რუსეთის პრეზიდენტს ვლადიმირ პუტინს დაურეკა და სანკტ-პეტერბურგის მეტროში გუშინ მომხდარ ტერაქტთან დაკავშირებით სამძიმარი გამოუცხადა.

ამის შესახებ პუტინის პრესსპიკერმა დიმიტრი პესკოვმა განაცხადა.

„პრეზიდენტებმა აღნიშნეს, რომ ტერორიზმი ბოროტებაა და მასთან ბრძოლა ერთობლივად უნდა მოხდეს“ - განაცხადა პესკოვმა.

დასავლური მედია კი თეთრ სახლზე დაყრდნობით იტყობინება, რომ დონალდ ტრამპმა ტერაქტის გამოძიების საქმეში რუსეთს სრული მხარდაჭერა გამოუცხადა.

შეგახსენებთ, გუშინ, მოსკოვის დროით 14:30-ზე სანკტ პეტერბურგის მეტროსადგურებს "Сенная площадь" და "Технологический институт-2"-ს შორის აფეთქება მოძრავ მატარებელში მოხდა, რომელმაც 11 ადამიანის სიცოცხლე იმსხვეროლა 47-მდე კი დაშავდა.

მოგვიანებით, პოლიციამ მეტროსადგურ „ამბოხების მოედანზე“ აუფეთქებელი ბომბი იპოვა.

რუსეთის გენერალურმა პროკურატურამ მეტროში მომხდარ აფეთქებას ტერაქტი უწოდა.

ამასთანავე ცნობილი ხდება რომ საგამოძიებო ორგანომ ძებნა გამოაცხადა ორ პირზე. ერთი, რომელმაც ვაგონში ასაფეთქებელი მოწყობილობა აამოქმედა და მეორე, რომელმაც სანკტ-პეტერბურგის კიდევ ერთ მეტროსადგურში დატოვა ბომბი, რომელიც საბოლოოდ არ აფეთქდა.

რუსეთის ქალაქებში უსაფრთხოების ზომები გაძლიერებულია. სანკტ-პეტერბურგის ხელისუფლებამ მეტროში მომხდარი აფეთქების გამო სამდღიანი გლოვა გამოაცხადა.