რუსეთის მთავრობა აფეთქების შედეგად დაღუპულთა ოჯახებს 2.025 მილიონ რუბლის გადაუხდის

მსოფლიო - 17:52, 03 Apr, 2017

3678

სანკტ-პეტერბურგის მეტროში მომხდარი აფეთქების შედეგად დაღუპულთა ოჯახებს რუსეთის მთავრობა 2.025 მილიონ რუბლის გადაუხდის.

ამის შესახებ სადაზღვევო პასუხისმგებლობის ეროვნული კავშირის პრეზიდენტი, იგორ იურგენსი იტყობინება.

შეგახსენებთ, სანკტ-პეტერბურგის მეტროსადგურში აფეთქება დღეს მოხდა.

აფეთქება, მეტროსადგურ “ტექნოლოგიური ინსტიტუტიდან" და „სენის მოედანზე" მიმავალი მატარებლის ვაგონში მოხდა. აფეთქების მიზეზი ვაგონში დაუდგენელი მოწყობილობის ამოქმედება გახდა.

რუსული მედიის ინფორმაციით, აფეთქებას მინიმუმ 10 ადამიანი ემსხვერპლა, მათ შორის არიან მცირეწლოვანი ბავშვებიც. დაშავებულია 50-მდე ადამიანი.

ინციდენტის ამსახველი ფოტო-ვიდეოკადრები სოციალურ ქსელში ვრცელდება.

სანკტ-პეტერბურგის მეტროში მომხდარ აფეთქებას გამოეხმაურა რუსეთის პრეზიდენტი, ვლადიმირ პუტინი. მისი თქმით, მომხდარის მიზეზი ჯერჯერობით დადგენილი არ არის, თუმცა განიხილება ყველა ვერსია, მათ შორის ტერორისტული აქტი.

ტელეკომპანია „დოჟდის“ ინფორმაციით, სანკტ-პეტერბუგში, პოლიციამ კიდევ ერთი ასაფეთქებელი მოწყობილობა იპოვა, მეტროსადგურ „ამბოხების მოედანზე“. ამ დროისთვის დახურულია ყველა მეტროსადგური.

უსაფრთხოების მიზნებიდან გამომდინარე დახურულია „პულკოვოს“ აეროპორტიც.