ღმერთი განსაცდელს გვივლენს, რომ უფრო მეტი ყურადღება მივაქციოთ ჩვენს ყოფაქცევას

ღმერთი განსაცდელს გვივლენს, რომ უფრო მეტი ყურადღება მივაქციოთ ჩვენს ყოფაქცევას - ილია მეორე

რელიგია - 17:02, 02 Apr, 2017

16452

სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა, უწმინდესმა და უნეტარესმა ილია მეორემ სამების ტაძარში საკვირაო წირვა ჩაატარა. წირვის შემდეგ, საკვირაო ქადაგებაზე მან მარიამ მეგვიპტელის მოღვაწეობაზე ისაუბრა და აღნიშნა, რომ მარიამ მეგვიპტელი არის მაგალითი, თუ როგორ შეიძლება ადამიანმა, რომელიც ცოდვილი ცხოვრებით ცხოვრობდა, წმინდანის ცხოვრებით იცხოვროს.

“წმინდა მარიამ მეგვიპტელი ყოველ ჩვენგანშია და ყველას გვეხმარება. უპირველეს ყოვლისა, თავის თავთან ბრძოლაში. ადამიანი თუ არ ებრძოლა თავის სულს, თავის ცხოვრებას, ის ადამიანი ვერ გაიმარჯვებს სხვაზე. ადამიანმა ჯერ თავის თავზე უნდა გაიმარჯვოს, უნდა დაამარცხოს თავისი ვნებები და მერე იქნება გამარჯვებული”, - აღნიშნა სრულიად საქართველოს კათოლიკოს-პატრიარქმა.
უწმინდესმა აღნიშნა, რომ დიდი მარხვის დასრულებამდე და უფალი იესო ქრისტეს ბრწყინვალე აღდგომამდე ორი კვირა დარჩა.
“უნდა ითქვას, რომ მძიმედ ჩავატარეთ ეს კვირა. ეს იმას ნიშნავს, რომ ღმერთი განსაცდელს გვივლენს, რათა უფრო ღრმად ჩავხედოთ ჩვენს სულს, გონებას. ეს იმას ნიშნავს, რომ უფრო მეტი ყურადღება მივაქციოთ ჩვენს ყოფაქცევას”, – აღნიშნა პატრიარქმა.