აშშ-ის პრეზიდენტმა დონალდ ტრამპმა ვაჭრობის შესახებ განკარგულებების ხელმოწერის ცერემონია თეთრი სახლის ოვალურ დარბაზში ისე დატოვა, რომ ამ განკარგულებებზე ხელი არ მოუწერია.

ვიდეოზე, რომელიც სოციალურ ქსელში გავრცელდა, ჩანს, ტრამპის შეჩერებას ვიცეპრეზიდენტი მაიკლ პენსი ცდილობს. თუმცა, ტრამპი აღარ დაბრუნებულა, პენსმა კი დოკუმენტები პრეზიდენტის მაგიდიდან აიღო და სხვა ოთახში გაიტანა. როგორც წესი, განკარგულებებსა და კანონებზე ხელმოწერის ცერემონია თეთრი სახლის ოვალურ დარბაზში მიმდინარეობს. ამ პროცესს ჟურბალისტებიც ესწრებიან .

მოგვიანებით ცნობილი გახდა, რომ ტრამპის მიერ ოვალური დარბაზის საჩქაროდ დატოვების მიზეზი, სავარაუდოდ, ერთ-ერთი ჟურნალისტის შეკითხა გახდა, რომელიც პრეზიდენტის ყოფილ მრჩეველს მაიკლ ფლინს ეხებოდა. ფლინმა თანამდებობა 13 თებერვალს დატოვა. გუშინ კი ცნობილი გახდა, რომ ის მზად არის აშშ-ის საპრეზიდენტო არჩევნებში რუსეთის შესაძლო ჩარევის შესახებ ჩვენება მისცეს.