თბილისის საქალაქო სასამართლომ მაია რჩეულიშვილსა და რუსუდან კერვალიშვილს 4-4 წლით თავისუფლების აღკვეთა მიუსაჯა.

„ცენტრ პოინტის“ დამფუძნებლებს მაია რჩეულიშვილსა და რუსუდან კერვალიშვილს, ასევე კომპანია „დექსუსის“ დამფუძნებელს ივანე ცაგურიას ბრალი ედებათ თაღლითობასა და თანხების მითვისებაში.

რუსუდან კერვალიშვილი სასამართლო დარბაზშივე დააპატიმრეს.

მაია რჩეულიშვილი სასამართლო პროცესს ანმრთელობის მდგომარეობის გამო ვერ დაესწრო. მას გულზე უნდა გაუკეთდეს ოპერაცია.

გამოძიების ინფორმაციით, მაია რჩეულიშვილმა და რუსუდან კერვალიშვილმა 11 მილიონზე მეტი ლარი მიითვისეს, რომელიც ამხანაგობა"თაბუკაშვილი 88"-ის ეკუთვნოდა.

მოსამართლის გადაწყვეტილებას სასამართლოში ხმაური და დაპირისპირება მოჰყვა. მანდატურებმა სასამართლო პროცესზე დამსწრეებს დარბაზი დაატოვებინეს. ადგილი ჰქონდა სიტყვიერი შელაპარაკებას.

სასჯელის ზომით უკმაყოფილებას გამოთქვამენ დაზარალებულები. მათ მოლოდინი ჰქონდათ, რომ სასჯელი ბევრად მკაცრი იქნებოდა და მიყენებული ზარალი ანაზღაურდებიდა.

"დღეს მივაღწიეთ განადგურებულ ოჯახს და კიდევ უფრო მეტად დაზარალებულ დაზარალებულებს"- ეს შეფასება კი რუსუდან კერვალიშვილის შვილმა ნინო დარასელმა სასამართლოს დასრულების შემდეგ გააკეთა.

ოჯახი საქალაქო სასამართლოს გადაწყვეტილებას გაასაჩივრებს.

”ჩვენს ოჯახზე მეტი ინტერესი, რომ ეს პრობლემა მოგვარებულიყო, ვერავის ექნებოდა. როცა მოგვარდებოდა დაზარალებულების პრობლემები, მოგვარდებოდა ჩვენი პრობლემებიც. აუცილებლად გავასაჩივრებთ. მგონია, რომ დიდი შეცდომა მოხდა” - განაცხადა დარასელმა.