რუსულმა სასამართლომ ალექსეი ნავალნი პატიმრობაში დატოვა

მსოფლიო - 11:14, 31 Mar, 2017

1517

რუსულმა სასამართლომ ოპოზიციის ლიდერი ალექსეი ნავალნი პატიმრობაში დატოვა. ის ციხეში 10 აპრილამდე დარჩება. დაცვის მხარე განაჩენის გასაჩივრებას და საქმის ადამიანის უფლებათა ევროპულ სასამართლოში გადაგზავნას აპირებს. შეგახსენებთ, მოსკოვის ტვერსკოის სასამართლომ რუსი ოპოზიციონერი ალექსეი ნავალნის არასანქცირებული მიტინგის ჩატარებისა და სამართალდამცავებისადმი დაუმორჩილებლობისთვის 15 დღით პატიმრობა მიუსაჯა და 20 000 რუბლის ოდენობის ჯარიმა დაეკისრა.

თავად ოპოზიციონერი თავს დამნაშავედ არ თვლის. მისი თქმით, აქციის ჩასატარებლად, მოსკოვის მთავრობას მიმართეს, თუმცა მათ რეაგირება არ ჰქონიათ.

26 მარტს, მოსკოვში გამართული ანტიკორუფციული, ოპოზიციური აქცია, ბოლო წლების განმავლობაში ყველაზე მასობრივი აღმოჩნდა.

მასობრივი აღმოჩნდა დაკავებებითაც.

ოფიციალური მონაცემებით, დაკავებულია 600 ადამიანი, თუმცა უფლებადამცველების თქმით, მათი რიცხვი გაცილებით მეტია. როგორც გაირკვა, 1993 წლის შემდეგ მსგავსი მასობრივი დაკავებები, რუსეთში არ დაფიქსირებულა.

ხალხის პროტესტი ნავალნის "ანტიკორუფციული ფონდის" მიერ გამოქვეყნებულმა გამოძიებამ გამოიწვია, რომელშიც პრემიერ დიმიტრი მედვედევის კორუფციულ კავშირებზე იყო საუბარი.