Daily Mail-მა დავით ბაგრატიონ-მუხრანბატონი “ჯამბაზ პრინცად“ მოიხსენია

მსოფლიო - 18:46, 29 Mar, 2017

11950

8 მარტს საქართველოს "სამეფო ოჯახის" წარმომადგენლები, მათ შორის დავით ბაგრატიონ-მუხრანბატონი, კენსინგტონის სასახლეში იმყოფებოდნენ. ქართველ სტუმრებს გლოჩესტერის ჰერცოგმა და ჰერცოგინიამ უმასპინძლეს. "სამეფო ოჯახმა" გაერთიანებული სამეფოს მონარქს ელისაბედ II-ს საჩუქრად სამეფო ორდენის დიდი ყელსაბამი გადასცა, მისი სახელით კი "საქართველოს არწივისა და უფლისა ჩვენისა იესუ ქრისტეს უკერველი კვართის სამეფო ორდენიც" მიიღეს.

"სამეფო დელეგაციის" ვიზიტს ბრიტანული გამოცემა Daily Mail გამოეხმაურა.

სტატიის სათაურში დავით ბაგრატიონ-მუხრანბატონი “ჯამბაზ პრინცად“ არის მოხსენიებული. (არ არის გამორიცხული, რომ ეს შეცდომაა და Clown Prince -ის ნაცვლად, Crown Prince უნდა იყოს).

როგორც გამოცემა წერს, სამეფო ოჯახების მიერ ერთმანეთისთვის საჩუქრების გადაცემა უცხო არ არის, თუმცა ორდნის გადაცემა დედოფლისთვის „უცნაურია“, რადგან ეწინააღმდეგება პროტოკოლოს, რომლის თანახმადაც, მსგავს საჩუქრებს დედოფალს სახელმწიფოების მეთაურები გადასცემენ.

„ტრადიციისამებრ, საჩუქარი სახელმწიფოს მეთაურისგან არ იყო მიმრთმეული, არამედ კრონპრინცის დავითის მიერ, რომელიც საქართველოს სამეფო ტახტზე პრეტენზიას აცხადებს. ქვეყანას კი 1810 წლიდან მონარქი არ ჰყავს“ - ნათქვამია სტატიაში.

სტატიაში, დავიდ ბაგრატიონისა და „ფლეიბოის მოდელისა და ტელეწამყვანის შორენა ბეგაშვილის“ რომანიც არის ნახსენები.

ისტორიკოსი უგო ვიკერი დეილი მეილისთან ამბობს, რომ სახელმწიფო მმართველებისგან დედოფლისადმი მიძღვნილი მსგავსი საჩუქრები, ვიზიტს უკავშირდება ხოლმე, დედოფალი ელიზაბედი კი საქართველოში ვიზიტს არ გეგმავს.

„არ ვთვლი, რომ ამას დიდი მნიშვნელობა უნდა მიენიჭოს, მაგრამ სანამ დედოფალს ძღვენის მიღების კარგი მიზეზი არ აქვს, მისი მიღება სირცხვილია“ - ამბობს ისტორიკოსი.

სტატიის მიხედვითვე, ბუკინგემის სასახლეში აცხადებენ, რომ ძღვენი საგარეო უწყებასთან კონსულტაციის შემდეგ მიიღეს და ყველაფერი წესის დაცვით, საქართველოს მთავრობის მხარდაჭერით მოხდა.

Daily Mail -სტატია შეგიძლიათ იხილოთ აქ.