ლონდონის თავდასხმა: ხალიდ მასუდის დედა განცხადებას ავრცელებს

მსოფლიო - 21:07, 27 Mar, 2017

5307

ლონდონის თავდასხმებში ეჭვმიტანილი, ხალიდ მასუდის დედა ჯანეტ აჯაო განცხადებას ავრცელებს:

„შოკირებული ვარ და ვწუხვარ ჩემი შვილის დამღუპველი ქმედების გამო, რასაც უდანაშაულო ადამიანები ემსხვეერპლნენ და დაშავდნენ, ვესტმინისტერში.

მას შემდეგ, რაც გავიგე, რომ ამ ყველაფერზე პასუხისმგებელი ჩემი შვილი იყო, უამრავი ცრემლი დავღვარე იმ ადამიანების გამო, რომლებიც ამ საშინელ ინციდენტში მოყვნენ.

მინდა ხაზგასმით აღვნიშნო, რომ არ ვამართლებ მის ქმედებებს და მხარს არ ვუჭერ მის რწმენას, რამაც ამ სისასტიკემდე მიიყვანა.

მინდა , მადლობა გადავუხარო ჩემს ოჯახს, მეგობრებს და საზოგადოებას , მხარდაჭერისა და სიყვარულისთვის“ - წერს ჯანეტი.

შეგახსენებთ, როგორც სკოტლანდ იარდმა განაცხადა, ლონდონის თავდასხმებში ეჭვმიტანილ ხალიდ მასუდს ტერორისტულ დაჯგუფებებთან "ისლამურ სახელმწიფოსთან" ან "ალ-ქაიდასთან" არავითარი კავშირი არ ჰქონდა.

ლონდონის პოლიციის თქმით, გამოძიების მსვლელობისას ხალიდის კავშირი ექსტრემისტულ დაჯგუფებებთან არ დასტურდება.

ბოლო ინფორმაციით, ვესტმინისტერის მიმდებარე ტერიტორიაზე განხორციელებული ორი თავდასხმის შედეგად, 4 ადამიანი დაიღუპა, დაშავებულია 50-მდე ადამიანი. გარდაცვლილებს შორის არის თავად თავდამსხმელიც.

ლონდონში ორი თავდასხმა 22 მარტს, მოხდა. ვესტმინისტერის ხიდზე მანქანა ქვეითებს დაეჯახა, შემდეგ კი მანქანის მძღოლმა პარლამენტის შენობაში შეჭრა სცადა.

როგორც თვითმხილველები აცხადებენ, დანით შეიარაღებული მამაკაცი პოლიციელს თავს დაესხა, საკანონმდებლო ორგანოს დაცვის წევრებმა კი მისი მისამართით ისროლეს. დაჭრილი პოლიციელი გარდაიცვალა, თავდამსხმელი კი პოლიციელებმა მოკლეს.

სამართალდამცავთა თქმით, ის დიდი ბრიტანეთის მოქალაქე , 52 წლის ხალიდ მასუდი იყო, რომელსაც 3 შვილი ჰყავს და პროფესიით მასწავლებელი იყო. სკოტლანდ იარდის წარმომადგენლის, მარკ როულის განცხადებით, თავდამსხმელის დაბადების სახელი და გვარი ნამდვილად ადრიან რასელია, თუმცა უცნობია, რატომ დასჭირდა მას ვინაობის შეცვლა.

მასუდი ინგლისის ჩრდილო-აღმოსავლეთის საგრაფო კენტში დაიბადა, სამართალდამცავებთან მას პრობლემა არაერთხელ ჰქონია, თუმცა, როგორც სკოტლანდ იარდი აცხადებს, მასუდი ტერორისტულ დაჯგუფებებთან ურთიერთობაში შემჩნეული არ ყოფილა და მის წინააღმდეგ ამ ეტაპზე არავითარი გამოძიება არ მიდიოდა.

თავის მხრივ, ლონდონის თავდასხმებზე პასუხისმგებლობა ექსტრემისტულმა დაჯგუფება "ისლამურმა სახელმწიფომ" აიღო.