ლონდონში მომხდარ თავდასხმას საერთაშორისო გამოხმაურება მოჰყვა

მსოფლიო - 09:14, 23 Mar, 2017

2214

ლონდონში რამდენიმე საათის წინ თავდასხმა მოხდა, რომელსაც ბრიტანული მედია "ტერორისტულ აქტად" ფასებს, თუმცა, ოფიციალური უწყებები სტატუსის მინიჭებისგან ჯერჯერობით თავს იკავებენ.

მომხდარს უკვე გამოეხმაურა სოციალურ ქსელში დიდი ბრიტანეთის ყოფილი პრემიერ-მინისტრი დევიდ კემერონი: „თანავუგრძნობ დაშავებულთა და გარდაცვლილთა ოჯახებს. ისინი, რომლებიც ცდილობენ მსგავსი ბარბაროსული მეთოდებით შეუტიონ ჩვენს დემოკრატიას, ვერასდროს გაიმარჯვებენ“, - წერს კემერონი.
ტვიტერში უსამძიმრებს გარდაცვლილთა ოჯახებს დონალდ ტუსკიც: "თანავუგრძნობ ვესტმინისტერის თავდასხმის მსხვერპლთა ოჯახებს, ევროპა დიდი ბრიტანეთის გვერდით დგას ტერორიზმის წინააღმდეგ და მზად არის დასახმარებლად".
ბელგიის პრემიერ-მინისრმა ჩარლზ მიშელმა განაცხადა: "ჩვენ თანავუგრძნობთ მათ ვინც გლოვობს და ყველას, ვინც დაშავდა ლონდონში. ბელგია მხარში უდგას დიდ ბრიტანეთს ტერორისზმთან ბრძოლაში".
დანიის პრემიერ-მინისტრმა ლარს ლოკ რასმუსენმა აღნიშნა: "შეძრწუნებულნი ვართ ლონდონის მოვლენებით. მე ვფიქრობ ჩვენს ბრიტანელ მეგობრებზე".
მომხდარს ტვიტერში გამოეხმაურა ანგელა მერკელი: "ღრმად შეძრწუნებული ვარ პოლიციასა და საზოგადოების წარმომადგენლებზე თავდასხმით. ვფიქრობ დაშავებულებზე და სოლიდარობას ვუცხადებთ დიდ ბრიტანეთს".
საფრანგეთის პრეზიდენტის ფრანსუა ოლანდის თქმით, საფრანგეთმა კარგად იცის რას განიცდის ბრიტანეთი, ოლანდი ტვიტერში წერს: "ტერორიზმი გვაძრწუნებს თითოეულ ჩვენგანს და საფრანგეთმა კარგად იცის რას განიცდის ბრიტანეთი ახლა".
ამერიკის შეერთებული შტატების პრეზიდენტს, დონალდ ტრამპსა და პრემიერ-მინისტრს ტერეზა მეის შორის სატელეფონო საუბარი შედგა.
ვესტმინისტერის ხიდსა და პარლამენტის შენობის ეზოში მომხდარი თავდასხმების შედეგად გარდაიცვალა 4 ადამიანი, მათ შორის თავდამსხმელი და პოლიცილეი, დაშავებულთა რაოდენობა 20-მდე გაიზარდა.