"თუ ევროპა ასე განაგრძობს, ვერც ერთი ევროპელი მსოფლიოს ვერც ერთ კუთხეში უსაფრთხოდ ვერ გაივლის"- ერდოღანი

მსოფლიო - 18:09, 22 Mar, 2017

11608

თურქეთის პრეზიდენტის რეჯეპ ტაიპ ერდოღანის განცხადებით, თუ ევროპული ქვეყნები თურქეთის მიმართ არსებულ დამოკიდებულებას არ შეიცვლიან, ვერცერთი ევროპელი მსოფლიოს მასშტაბით, ვერ შეძლებს "უსაფრთხოდ სიარულს".

"თუ ევროპა ამგვარად განაგრძობს მოქცევას, ვერც ერთი ევროპელი მსოფლიოს ვერც ერთ კუთხეში უსაფრთხოდ ვერ გაივლის ქუჩებში“ - განაცხადა ერდოღანმა.

თურქეთის პრეზიდენტის თქმით, თურქეთი არ არის ის ქვეყანა, რომლის „მინისტრების ქვეყნიდან გაგდება შეიძლება.“

შეგახსენებთ, რომ ბოლო პერიოდში თურქეთს გერმანიასთან და ჰოლანდიასთან ურთიერთობა დაიძაბა.

ჰოლანდია მეოთხე სახელმწიფო გახდა, რომელმაც თურქ დიასპორას იმ სააგიტაციო მიტინგის ჩატარების უფლება არ მისცა, რომელიც პრეზიდენტისთვის უფლებამოსილების გაზრდის შესახებ 16 აპრილს დაგეგმილი რეფერენდუმის შინაარსის გაცნობას ეხება. ამავდროულად, ჰოლანდიის ხელისუფლებამ, თურქეთის სასაგრეო საქმეთა მინისტრი, რომელიც მიტინგზე დასწრებას აპირებდა, როტერდამში არ შეუშვა და მისი თვითმფრინავი უკან გააბრუნა.

აღნიშნული ფაქტის შემდეგ ერდოღანმა ჰოლანდიას "ბანანის რესპუბლიკა" უწოდა.

როტერდამიდან გაბრუნებული მევლუთ ჩავუშოღლუ სააგიტაციო მიტინგს საფრანგეთის ქალაქ მეცში დაესწრო და ჰოლანდიას „ფაშიზმის დედაქალაქი“ უწოდა.

ჩავუშოღლუს ნოტერდამში არშეშვების შემდეგ, თურქეთის პრეზიდენტმა „ნაცისტურ ქმედებებში“ გერმანიის შემდეგ, ნიდერლანდებიც დაადანაშაულა.

შეგახსენებთ, თურქეთის პრეზიდენტმა რეჯეპ ტაიპ ერდოღანმა გერმანია „ნაცისტურ ქმედებებში“ მას შემდეგ დაადაშაულა, რაც ადგილობრივმა ხელისუფლებამ თურქ მინისტრებს აქციის ჩატარებაზე უარი განუცხადა.

ჰოლანდიისა და გერმანიის გარდა, მიტინგების ჩატარებაზე თურქულ დიასპორას უარი უთხრეს ავსტრიისა და შვეიცარიის მთავრობებმაც.

პრეზიდენტის უფლებამოსილების გაზრდასთან დაკავშირებით თურქეთში რეფერენდუმი 16 აპრილს არის დაგეგმილი. აღნიშნული ცვლილებით, პრეზიდენტს ექნება ბრძანებების, მინისტრების დანიშვნის, პრემიერის ინსტიტუტის გაუქმების, რეფერენდუმზე საკონსტიტუციო ცვლილებების საკითხის გამოტანის უფლება.