საფრანგეთის პრეზიდენტობის კანდიდატი „რესპუბლიკელებიდან“ ფრანსუა ფიიონი მორიგ სკანდალში გაეხვა.

გამოცემა Le Canard Enchaîné-ს ინფორმაციით, ფიიონი 2015 წელს ლიბანელ მილიარდერს , ნავთობსადენი კომპანია Future Pipe Industries-ის მფლობელ ფუად მაჰზუმის დაეხმარა, შეხვედროდა ფრანგული ნავთობკომპანია Total-ის ხელმძღვანელსა და რუსეთის პრეზიდენტს ვლადიმირ პუტინს.

გამოცემის თანახმად, აღნიშნული შეხვედრის ორგანიზებისთვის ფიიონმა 50 000 აშშ დოლარი მიიღო.

შეხვედრა 2015 წლის ივნისში სანკტ-პეტერბურგში საერთაშორისო ეკონომიკურიფორუმის ფარგლებში გაიმართა.

ეს ფიიონის ირგვლივ პირველი სკანდალი არ არის. სკანდალი საფრანგეთის პრეზიდენტობის კანდიდატის, ფრანსუა ფიიონის გარშემო მას შემდეგ ატყდა, რაც ინფორმაცია გავრცელდა, რომ ფრანსუა ფიიონის დეპუტატობისას, პენელოპა ფიიონმა მის თანაშემწედ მუშაობისას თვეში 3 677 ევროს იღებდა. ფრანგული მედიის ცნობით, არსებობს ეჭვი, რომ ეს ფიქტიური სამუშაო იყო და ფიონმა ნახევარი მილიონი ევრო „არაფრის კეთებისთვის მიიღო.“

აღნიშნული ინფორმაციის გავრცელების შემდეგ, საფრანგეთის პროკურატურამ გამოძიება დაიწყო. სამართალდამცავებმა ფიიონის სახლში ჩხრეკაც ჩაატარეს.

მეორე გაუგებრობა Journal du Dimanche-ის მიერ გავრცელებულმა ინფორმაციამ გამოიწვია, რომლის თანახმად, ფიიონმა მოდის სახლ Arnie-გან ორი ძვირადღირებული კოსტიუმი მიიღო. გამოცემის ცნობით, ორი კოსტიუმის ღირებულება 13 ათას დოლარს აჭარბებს. როგორც გაირკვა, აღნიშნული კოსტუმები ფიიონს მისმა მეგობარმა, თებერვალში აჩუქა.

საფრანგეთის კანონმდებლობის თანახმად კი, საარჩევნო კამპანიის დროს, კანდიდატისთვის 4 ათას 600 ევროზე მეტის შეწირვა იკრძალება.