საფრანგეთის ხუთ საპრეზიდენტო კანდიდატს შორის პირველი ტელედებატები გაიმართა

მსოფლიო - 12:36, 21 Mar, 2017

1531

საფრანგეთში, ტელეარხ TF1-ზე საპრეზიდენტო არჩევნების პირველი ტელედებატები გაიმართა. დებატებში მონაწილეობა ხუთმა წამყვანმა საპრეზიდენტო კანდიდატმა მიიღო: „რესპუბლიკელების“ ფრანსუა ფიიონმა, „ეროვნული ფრონტის“ ლიდერმა მარინ ლე პენმა, მმართველი „სოციალისტური პარტიის“ კანდიდატმა ბენუა ამონმა, პოლიტიკური მოძრაობა „წინ“-ის ლიდერმა ემანუელ მაკრონმა და პარტია „დაუმორჩილებელი საფრანგეთის“ ლიდერმა ჟან-ლუკ მელანშონმა.

საპრეზიდენტო მარათონის ფავორიტებმა ემანუელ მაკრონმა და მარინ ლე პენმა სანაპიროებზე, მუსლიმი ქალებისთვის ბურკინების აკრძალვაზე იკამათეს. მაკრონმა განაცხადა, რომ ლე პენს სურს, საფრანგეთში მაცხოვრებელი ყველა მუსლიმი ქვეყნის მტრად გადააქციოს.

ბენუა ამონი კვლავ მმართველი პარტიის ლოზუნგებით გამოვიდა. ფრანსუა ფიიონმა გამარჯვების შემთხვევაში "ეროვნული აღორძინების" პირობა დადო.

ლე პენმა კი განაცხადა, რომ ქვეყანაში მიგრანტების შედინებას შეაჩერებს, ქვეყნის ინტერესბიდან გამომდინარე იმოქმედებს, რადგან არ აპირებს "მერკელის ვიცე-კანცლერი გახდეს."

ჟან ლიუკ მელაშონმა კი განაცხადა, რომ ევროპაში საზღვრების საკითხი უნდა გადაიხედოს, რადგან საბჭოთა კავშირის დაშლის შემდეგ, არასაიმედო ვითარება შეიქმნა და მაგალითად რუსეთი და უკრაინა მოიყვანა.

ყირიმის ანექსიაზე საუბრისას, კონკურენტის პოზიციას დაეთანხმა ფრანსუა ფიონი. მან კოსოვოს პრეცედენტი გაიხსენა და აღნიშნა, რომ ევროპამ თავად შეცვალა საზღვრები და ამით დაიცვა დემოკრატიის ფუნდამენტური პრონციპი, რომელიც ხალხის თვითგამორკვევის უფლებას ეხება.

კატეგორიული წინააღმდეგობა გაუწია მათ ემანუელ მაკრონმა. მან ოპონენტებს მიუთითა, რომ ევროპამ და კერძოდ, საფრანგეთმა ვლადიმერ პუტინთან დაახლოებაზე უარი უნდა თქვას.

გამოკითხვის თანახმად, დებატებში გამარჯვებულად , მაკრონსა და მელაშონს აღიარებენ.

საფრანგეთში საპრეზიდენტო არჩევნების პირველი ტური 23 აპრილს გაიმართება. თუკი ერთ-ერთი კანდიდატი ხმების 50%-ზე მეტს ვერ აიღებს, რაც მოსალოდნელია, ყველა მეტი ხმების მქონე 2 კანდიდატი მეორე ტურში გადავა და არჩევნების მეორე ტური 7 მაისს გაიმართება.

წინასწარი გამოკითხვებით, არჩევნების პირველ ტურში მარინ ლე პენი ხმათა 25%-ზე მეტს ვერ აიღებს, მეორე ტურშუ კი დამარცხდება, როგორც მაკრონთან, ასევე ფიიონთან.