სტივენ ჰოკინგი კოსმოსში მიემგზავრება

მსოფლიო - 11:41, 21 Mar, 2017

5944

ცნობილი ფიზიკოსი და კოსმოლოგი სტივენ ჰოკინგი კოსმოსში გაემგზავრება.

ამის შესაძლებლობას მეცნიერს რიჩარდ ბრენსონის კომპანია Virgin group-ი მისცემს.

როგორც თავად ჰოკინგმა "Good Morning Britain"-ის ჟურნალისტთან საუბრისას განაცხადა, მას არასოდეს უოცნებია, რომ კოსმოსში გამგზავრებას შეძლებდა, თუმცა როგორც კი რიჩარდ ბრენსონმა ადგილი შესთავაზა, მაშინვე დათანხმდა.

"ჩემმა სამმა შვილმა უდიდესი სიხარული მომანიჭა და მე შემიძლია, ზუსტად გითხრათ, რა გამაბედნიერებს - კოსმოსში მოგზაურობა" - განაცხადა ფიზიკოსმა.

ჯერ კიდევ 2015 წელს, რიჩარდ ბრენსონმა განაცხადა, რომ იმედოვნებდა, ერთ დღესაც მას მიეცემოდა შესაძლებლობა, ჰოკინგი " ვარსკვლავებთან წაეყვანა." განცხადებაში ბრენსონი აღნიშნავდა, რომ მისი ეს შეთავაზება განპირობებული იყო იმ უდიდესი მოკრძალებითა და აღფრთოვანებით, რასაც იგი ჰოკინგისადმი განიცდიდა.

75 წლის ჰოკინგი ამიოტროფული გვერდითი სკლეროზით დაავადებული პირველი ადამიანი იქნება, რომელიც კოსმოსს ეწვევა.

აღნიშნული დიაგნოზი ჰოკინგს 21 წლის ასაკში დაუსვეს. დაავადება, სიმძიმისგან გამომდინარე, დიაგნოზის დასმიდან ხუთი წლის განმავლობაში სიკვდილს იწვევს , თუმცა ჰოკინგმა "ვადას" უკვე 50 წლით გადააჭარბა.

ვირჯინ გალაქტიკით კოსმოსში გაფრენა $250 ათასი ღირს, მაგრამ სტივენ ჰოკინგისთვის ეს მოგზაურობა უფასო იქნება. ხომალდის პირველი ფრენა 2017 წლის ბოლოს არის დაგეგმილი.