“თავიდან მეც ჩვეულებრივი მკერავი ვიყავი, შემდეგ დაინახეს ჩემი შესაძლებლობები და დამაწინაურეს“... - ამბობს ელისო ქარჩავა, რომელიც კომპანია “პანცილიონში“ წარმოების უფროსად მუშაობს.

-რა სპეციალობის ხართ და რას საქმიანობდით “პანცილიონში“ მოსვლამდე?

- დავამთავრე თბილისის სახელმწიფო უნივერსიტეტი, ეკონომიკის ფაკულტეტი. სპეციალობით ძალიან ცოტა ხანი ვიმუშავე, რადგან ძალიან რთული პერიოდი ედგა საქართველოს - უკიდურესი გაჭირვება, არეულობა... ამიტომ ოჯახთან ერთად ქვეყნიდან დატოვება მომიხდა და სამუშაოდ რუსეთში წავედი. იქ 14 წელი დავყავი და მინდა ვთქვა რომ საკმაოდ ნაყოფიერად და წარმატებულად ვიმოღვაწევე...

-მიუხედავად ამისა, საქართველოში დაბრუნდით...

-რა თქმა უნდა, თავიდანვე ასე მქონდა გამიზნული და ვიცოდი რომ საქართველოში აუცილებლად დავბრუნდებოდი...

-“პანცილიონის“ გუნდს როდის შემოუერთდით?

- შვილები უკვე სტუდენტები იყვნენ, მე უსაქმოდ ყოფნა არ შემეძლო და სამსახურს აქტიურად ვეძებდი. იქედან გამომდინარე, რომ რუსეთში სამკერვალო სალონში ვმუშაობდი აქაც იგივე სფეროში ვცადე ბედი და მუშაობა დავიწყე ერთ-ერთ სამკერვალოში. ერთხელაც ამ სალონში “პანცილიონის“ წარმომადგენლები იყვნენ მოსულები და შეკვეთა “მოგვცეს“. იმდენად მოეწონათ ჩემი ნამუშევარი, რომ მათ საწარმოში მუშაობა შემომთავაზეს. ეს იყო დაახლოებით 8 წლის წინ... თავიდან მეც ჩვეულებრივი მკერავი ვიყავი, თუმცა შემდეგ დაინახეს ჩემი შესაძლებლობები როგორც დიზაინის, ისე მენეჯმენტის კუთხით და დამაწინაურეს.

-როგორი იყო საწარმო თქვენი მოსვლისას და რა სიახლეები დაინერგა ამ ხნის განმავლობაში?

- როცა საწარმოში მოვედი შედარებით მოძველებულ დანადგარებზე ვმუშაობდით. ამ ხნის მანძილზე საწარმო ეტაპობრივად განვითარდა, განახლდა მანქანა-დანადგარები, ავიყვანეთ ახალი კადრები... რაც მთავარია, ეს ჯერ კიდევ ყველაფერი არ არის და კიდევ უამრავი სიახლეა დაგეგმილი. მალე ახალი, უფრო დიდი მასშტაბის საწარმო აშენდება, რომელიც კიდევ უფრო თანამედროვე ტექნიკით იქნება აღჭურვილი, რაც გაზრდის როგორც ავეჯის ხარისხს, ისე გააადვილებს მუშაობის პროცესს საწარმოში დასაქმებულთათვის. ეს ფართი ნამდვილად არ არის საკმარისი იმისთვის, რასაც ჩვენ ვაკეთებთ, რადგან მოთხოვნა გაცილებით დიდია და მის დაკმაყოფილებას 2-3-ჯერ დიდი ფართი სჭირდება. მინდა მადლობა გადავუხადო “პანცილიონის“ დირექტორსა და დამფუძნებელს, ხვიჩა ბანცურს პროფესიონალიზმისთვისა და ადამიანობისთვის. იგი არის ნოვატორი ადამიანი, რომელიც საწარმოს განვითარებაზე და თანამშრომლების კეთილდღეობაზე მუდმივად ზრუნავს.

-საქართველოში ავეჯს ბევრი კომპანია აწარმოებს, როგორ უმკლავდებით კონკურენციას?

-“პანცილიონის“ მთავარი უპირატესობა ხარისხია. ჩვენთან იქნება უმაღლესი ხარისხის ავეჯი, რომელიც ევროპულ სტანდარტებს შეესაბამება და სრულად აკმაყოფილებს ყველანაირი მომხმარებლის მოთხოვნილებას.

“პანცილიონი“ ქმნის ხარისხს!