დიდი ბრიტანეთის პრემიერ-მინისტრი ტერესა მეი დიდი ბრიტანეთი ევროკავშირიდან გასვლის პროცედურებს მომავალი კვირიდან იწყებს.

Downing Street-ის ინფორმაციით, ინფორმაცია ტერეზა მეის პრესსპიკერმა დაადასტურა. მეიმ წერილი მისწერა ევროპის საბჭოს, სადაც ის გასვლასთან დაკავშირებით მოლაპარაკებების დაწყებას 29 მარტიდან ელოდება.

შეგახსენებთ, გასულ კვირას დიდი ბრიტანეთის დედოფალმა ელისაბედ მეორემ ხელი მოაწერა კანონპროექტს, რომელიც ევროკავშირის დატოვების პროცედურების დაწყებას ითვალისწინებს.

მანამ ბრიტანეთის პარლამენტის ორივე პალატამ დაამტკიცა კანონპროექტი დიდი ბრიტანეთის ევროკავშირიდან გასვლის პროცედურის დაწყების შესახებ.

შეგახსენებთ, გაერთიანებულ სამეფოში რეფერენდუმი გასული წლის 23 ივნისს ჩატარდა. ამომრჩეველთა 51,9%-მა ქვეყნის ევროკავშირიდან გასვლას დაუჭირა მხარი, 48,1 % წინააღმდეგი იყო.

ლონდონსა და შოტლანდიაში, ასევე ჩრდილოეთ ირლანდიაში ხმა ევროკავშირში დარჩენის სასარგებლოდ მისცეს, თუმცა უელსსა და ინგლისის საგრაფოებში ევროკავშირიდან გასვლას დაუჭირეს მხარი.

რეფერენდუმის შედეგების გამოცხადებისთანავე დიდი ბრიტანეთის პრემიერ-მინისტრმა დევიდ ქემერონმა თანამდებობა დატოვა. მისი თქმით, არასწორი იქნება, დარჩეს “გემის კაპიტნად” მაშინ, როდესაც დიდი ბრიტანეთის მოსახლეობამ სხვა გზა აირჩია.