ერდოღანი და პუტინი ერთმანეთს მოსკოვში შეხვდნენ

მსოფლიო - 19:57, 10 Mar, 2017

2550

თურქეთის პრეზიდენტი რეჯეპ ტაიპ ერდოღანი რუს კოლეგას ვლადიმირ პუტინს მოსკოვში შეხვდა.

ერდოღანმა და პუტინმა დახურულ კარს მიღმა გამართეს პირისპირი შეხვედრა, რომელიც ორი საათის განმავლობაში გრძელდებოდა.

CNN-ის ცნობით, პრეზიდენტების შეხვედრის მთავრ თემას სირიის საკითხი წარმოადგენდა, სადაც რუსეთი და თურქეთი სამხედრო ქმედებებს კოორდინირებულად ახორციელებენ.

„ჩვენ ძალიან მოხარულები ვართ სახელმწიფოთაშორისი ურთიერთობების საკმაოდ სწრაფად აღდგენის გამო“ - განაცხადა პუტინმა შეხვედრის დაწყებამდე.

„ჩვენ აქტიურად ვმუშაობთ ყველაზე მწვავე კრიზისების გადაჭრაზე, პირველ რიგში სირიაში. მოხარული ვარ ვთქვა, ყველასთვის მოულოდნელად, ჩვენმა სამხედროებმა და სპეცსამსახურებმა ეფექტური და მჭიდრო კონტაქტი დაამყარეს, ჩვენ გვაქვს ძალიან სანდო და ეფექტური დიალოგი“ - განაცხადა რუსეთის ლიდერმა.

„სავაჭრო და ეკონომიკური ურთიერთობებიც ვითარდება“ - დასძინა პუტინმა.

ერდოღანსა და პუტინს შორის ბოლო შეხვედრა გასული წლის აგვისტოში გაიმართა, მას შემდეგ რუსეთმა თურქეთისთვის დაწესებული სანქციები შეამსუბუქა. სანქციები, თურქეთის მიერ თურქეთის საჰაერო სივრცეში შესული რუსული ბომდამშენის ჩამოგდებას მოჰყვა.