დღეს ბავშვთა უფლებების დაცვის საერთაშორისო დღეა

საზოგადოება - 10:54, 01 Jun, 2013

4428

სპორტისა და ახალგაზრდობის საქმეთა სამინისტროს სსიპ "ბავშვთა და ახალგაზრდობის ეროვნული ცენტრი"-ს ორგანიზებით დილიდან ღონისძიებები გაიმართება კუს ტბაზე. სპორტული ღონისძიებების გარდა ბავშვებს "ბასტი ბუბუ" და სხვადასხვა ზღაპრის გმირები გაართობენ. დაგეგმილია ფლეშმობი და ილუზიონისტის შოუ.
გაიმართება მოსწავლე - ახალგაზრდობის სასახლის ბავშვების ნახატების და შეზღუდული შესაძლებლობების მქონე ბავშვების მიერ შექმნილი ნივთების გამოფენა.
გახსნილი იქნება წიგნების კუთხე, სადაც გაიმართება ბავშვების შეჯიბრი მხატვრულ კითხვაში.
მსგავსი ტიპის ღონისძიებები გაიმართება ვაკის პარკშიც.
"მთაწმინდის პარკში" ბავშვთა დაცვის საერთაშორისო დღისადმი მიძღვნილი ღონისძიებები კი კონცერტით გაიხსნება. მოგვიანებით კი ცენტრალური საბავშვო შოუ გაიმართება.
ამ დღესთან დაკავშირებით გლდანის მაჟორიტარი დეპუტატი სოსო ჯაჭვლიანი და ოკუპირებული ტერიტორიებიდან დევნილთა, განსახლებისა და ლტოლვილთა მინისტრი დავით დარახველიძე აფხაზეთიდან დევნილ ბავშვებს საჩუქრებს გადასცემენ და ბავშვთა დღეს მიულოცავენ. დევნილ ბავშვებს არასამთავრობო ორგანიზაცია "კავკასიის განვითარების" ინციატივით ტყვიის სროლის ფედერაციაც უმასპინძლებს.
ამ დღესთან დაკავშირებით, ავჭალის #11 დაწესებულებაში, არასრულწლოვან მსჯავრდებულებს ანსამბლი "გორდელა" და ჯგუფი "მგზავრები" ესტუმრებიან, რომლებიც ცოცხალი შესრულებითა და სხვადასხვა ინსტრუმენტების გამოყენებით საკუთარ შემოქმედებას წარადგენენ. 10 არასრულწლოვანი პრობაციონერი კი კინოთეატრ "ამირანში" კინოფილმ "ფორსაჟის" ჩვენებას დაესწრება.