ევროპაში NATO-ს გაერთიანებული ძალების მეთაურის მოადგილე ადრიან ბრედშოუ Times-თან ინტერვიუში აცხადებს, რომ ფეიკ-ახალი ამბები, კიბერშეტევა და პოლიტიკური ზეწოლა რუსეთის მხრიდან ალიანსისთვის უნდა აღიქმებოდეს როგორც შეიარაღებული აგრესიის აქტი.

ეს სიტყვები, ფაქტობრივად ხაზს უსვამს გენერლის მოსაზრებას, რომ ჩრდილოატლანტიკურმა ალიანსმა უნდა განავრცოს წესდების მე-5 მუხლის განმარტება, რომლის თანახმადაც ალიანსის წევრ ქვეყანაზე თავდასხმა მთლიანად ალიანსზე თავდასხმად განიხილება.

ბრედშოუ მიიჩნევს, რომ დღეისათვის NATO უნდა მუშაობდეს არამარტო სამხედრო შეკავების მიმართულებით, მან ევროკავშირთან და სხვა მოკავშირეებთან ერთად უნდა მოახდინოს არამარტო სამხედრო, არამედ დიპლომატიური, პოლიტიკური, ეკონომიკური და საინფორნმაციო სფეროების კოორდინაცია.

„ჰიბრიდული ომის პირობებში ჩვენ ჰიბრიდული შეკავების მექანიზმები გვჭირდება,“ - აღნიშნავს ბრიტანელი გენერალი.

„რუსული კიბერშეტევების საპასუხოდ ალიანსს ჯერჯერობით საკუთარი ძალის დემონსტრირება არ მოუხდენია. ნატო მზად უნდა იყოს საპასუხო შეტევისათვის, ასევე მზად უნდა ვიყოთ პუტინის ჯაშუშების განდევნისათვის,“ აცხადებს ბრედშოუ.

„წესდების მეხუთე მუხლმა ცივი ომის დროს დიდი სამსახური გაგვიწია მოსკოვის მხრიდან ბირთვული საფრთხის შეჩერებაში. დღეს ციფრული ეპოქაა და ანალოგიური საშუალებები ჩვენც გვჭირდება,“ - ასკვნის გენერალი.