დღეს საქართველოს პატრიარქის პრეს-მდივანმა მიქაელ ბოტკოველმა გააკეთა განცხადება პატრიარქის პირადი დაცვის უფროსის სოსო ოხანაშვილის შესახებ და განაცხადა, რომ უწმინდესის გერმანიიდან დაბრუნების შემდეგ, მას ოხანაშვილი საპატრიარქოში აღარ უნდახავს.

„სოსო ოხანაშვილი საპატრიარქოში არ იმყოფება. არ ვიცი ამასთან დაკავშირებით არაფერი. პატრიარქის დაცვის შემადგენლობა საპატრიარქოშია, თუმცა რაც მისი უწმინდესობა საქართველოში დაბრუნდა, მე სოსო ოხანაშვილი საპატრიარქოში არ მინახავს“, - განაცხადა დეკანოზმა მიქაელ ბოტკოველმა.

პატრიარქის პრეს-მდივნის აღნიშნულ განცხადებას სოსო ოხანაშვილი მალევე გამოეხმაურა და განაცხადა, რომ მიქაელ ბოტკოველმა იცრუა:

„მიქაელ ბოტკოველმა იცრუა, მოიტყუა, როდესაც თქვა, რომ მე არ ვიმყოფები საპატრიარქოში, გერმანიიდან ჩამოსვლის დღიდან მე ვიმყოფები საპატრიარქოში და ვასრულებ ჩემს მოვალეობას“, - განაცხადა ოხანაშვილმა და დასძინა, რომ უახლოეს მომავალში გამართავს ბრიფინგს, სადაც ისაუბრებს მისი გადაწყვეტილებისა და არსებული ვითარების შესახებ.

რამდენიმე წუთის წინ კი ცნობილი გახდა, რომ მიქაელ ბოტკოველმა პატრიარქის პრეს-მდივნის თანამდებობა დატოვა. დეკანოზი გადაწყვეტილების მიზეზებზე არ საუბრობს, თუმცა ოხანაშვილს თავხედს უწოდებს:

„დღეს მივიღე გადაწყვეტილება გადადგომის შესახებ, მიზეზებზე არ ვისაუბრებ, ამიერიდან სხვისგან მიიღებთ კომენტარებს. საპატრიარქოში არ მინახავს ოხანაშვილი და არც პატრიარქის გვერდით, ის თავხედია, როდესაც საუბრობს ჩემს შესახებ, რომ ის საპატრიარქოში იმყოფება, მე არ მითქვამს რომ ის გაათავისუფლეს, მე ვთქვი გასაგებად, რომ არ მინახავს საპატრიარქოში და მართლა არ მინახავს,. მე უკვე დავტოვე საპატრიარქო და ალბათ ჩემი განცხადების შემდეგ მიბრძანდა და გააკეთა ეს განცხადება“, - განაცხადა მიქაელ ბოტკოველმა.