10 წლის გოგონამ მათემატიკური განტოლების ამოხსნაში დასახმარებლად პოლიციას მიმართა

მსოფლიო - 12:20, 22 Feb, 2017

16008

რა უნდა ქნან სკოლის მოსწავლეებმა , თუკი მათემატიკის დავალების შესრულებისას, მაგალითს ვერ ამოხსნიან?
ოჰაიოს შტატის ქალაქ მარიონის მაცხოვრებელმა ლენა დრეიპერმა მარტივი გამოსავალი იპოვა და საშინაო დავალების დაწერაში დახმარება პოლიციას სთხოვა.

როგორც აღმოჩნდა, ლენა დრეიპერი მათემატიკის დავალების წერისას განტოლების ამოხსნაში „გაიჭედა“ და დასახმარებლად არც მეტი არც ნაკლები პოლიციას დაუკავშირდა. გოგონამ პოლიციის განყოფილებას ფეისბუკზე მისწერა.

„საშინაო დავალებასთან დაკავშირებით პრობლემა მაქვს. იქნებ, შეძლოთ ცოტათი დამეხმაროთ?“ - წერს გოგონა.

„დიახ, კონკრეტუალდ რა?“ - პასუხობს ლეიტენანტი ბი ჯეი გრაბერი.

„ვერ გავიგე (8+29)x15“ - წერს ლენა.

გოგონა და ლეიტენანტის მიმოწერის სქრინი დედამ ფეისბუკზე გამოაქვეყნა და პოლიციელს მადლობა გადაუხადა საზოგადოებასთან ნამდვილი და გულწრფელი ურთიერთობისთვის.

მოგვიანებით, ბიბისისთან ინტერვიუში გრაბერმა ისაუბრა და თქვა, რომ თავდაპირველად ეგონა, გოგონას დახმარება რეგიონის ისტორიაში სჭირდებოდა, თუმცა დავალება მათემატიკაში აღმოჩნდა, რაშიც დაეხმარა.

თუმცა, გაირკვა, რომ გრაბერი მათემატიკაში არც ისე ძლიერი აღმოჩნდა და მათემატიკური მოქმედებები არასწორი თანმდიდევრობით შეასრულა. მაგრამ ამას ხელი არ შეუშლია იმაში, რომ მარიონის პოლიციას მისთვის მადლობა გადაეხადა. პოლიციის განყოფილების განცხადებით, ეს მაგალითი მიუთითებს საზოგადოების მაღალ ნდობაზე პოლიციისადმი, თუმცა დასძინა, რომ „თანამშრომლებს მათემატიკაში მეცადიენობა არ აწყენთ.“

თავად ლენამ ადგილობრივ გამოცემასთან საუბარში აღნიშნა, რომ მას ყოველთვის ახსოვს, დახმარებისთვის პოლიციას მიმართოს. თუმცა, დასძინა, რომ სათადარიგო გეგმაც აქვს.

„სხვა შემთხვევაში მოჩვენებებზე მონადირეებს დავურეკავ“ - განმარტა ლენამ