მეჰრიბან ალიევა: ბატონო პრეზიდენტო, მჯერა, თქვენს ნდობას გავამართლებ

მსოფლიო - 10:55, 22 Feb, 2017

20570

გუშინ ცნობილი გახდა, რომ აზერბაიჯანის პრეზიდენტმა ილჰამ ალიევმა თავისი მეუღლე მეჰრიბან ალიევა ქვეყნის პირველ ვიცე-პრეზიდენტად დანიშნა.
მეჰრიბან ალიევამ აზერბაიჯანის უშიშროების საბჭოს სხდომაზე პრეზიდენტს ნდობისთვის მადლობა გადაუხადა.
„სრულად ვაცნობიერებ ჩემზე დაკისრებული პასუხისმგებლობას. ბატონო პრეზიდენტო, მჯერა, რომ თქვენსა და ხალხის ნდობას გავამართლებ. ჩემი წარმატების უკან თქვენი დახმარება და მხარდაჭერა დგას. ბოლო წლების განმავლობაში სახელმწიფოებრიობის შესახებ თქვენი იდეები, პატრიოტიზმი, აზერბაიჯანელ ხალხთან ერთიანობა ჩემთვის სამაგალითო იყო" - განაცხადა აზერბაიჯანის პირველმა ვიცე-პრეზიდენტმა.

მეჰრიბან ალიებას ვიცე-პრეზიდენტად დანიშვნის შესახებ ინფორმაცია, გუშინ, აზერბაიჯანის პრეზიდენტის ოფიციალურ ვებგვერდზე გამოქვეყნებულ განცხადებაშია საუბარი.

2015 წელს ილჰამ ალიევმა მეჰრიბან ალიევა "ჰეიდარ ალიევის" ორდენითაც დააჯილდოვა.

გასული წლის სექტემბერში, კონსტიტუციაში ცვლილებების შეტანის საკითხზე , აზერბაიჯანში რეფერენდუმი ჩატარდა. მთლიანობაში, კონსტიტუაციაში 29 ცვლილება იქნა შეტანილი, მათ შორის ერთ-ერთი ვიცე-პრეზიდენტის თანამდებობის შემოტანას ითვალისწინებდა. გარდა ამისა საპრეზიდენტო ვადა 5-იდან 7 წლამდე გაიზარდა.

ამ დრომდე აზერბაიჯანის ვიცე-პრეზიდენტის პოსტი ვაკანტური იყო.