"ტერორისტული აქტი? რა მოწია?" - შვედეთის ექსპრემიერი ტრამპის განცხადებას გამოეხმაურა

მსოფლიო - 14:06, 21 Feb, 2017

6536

აშშ-ის პრეზიდენტი დონალტ ტრამპი ეპატაჟური განცხადებს კვლავ არ ერიდება, თუმცა მისი ბოლო განცხადება, დამაბნეველი უფრო იყო, ვიდრე სკანდალური.

შაბათს, დონალდ ტრამპმა კიდევ ერთხელ ისაუბრა მიგრანტების საკითხზე და ქვეყანაში მათი შეშვებით გამოწვეული სირთულის აღსაწერად, შვედეთის მაგალითი მოიყვანა, თუმცა, ალბათ აშკარად ინანა.

ტრამპმა შვედეთში მომხდარ ტერაქტზე ისაუბრა, რომელიც რეალურად არ მომხდარა.

„ნახეთ, რა ხდება გერმანიაში. ნახეთ, რა მოხდა გუშინ შვედეთში. შვედეთი! ვინ წარმოიდგენდა?! მათ მიგრანტების დიდი რიცხვი მიიღეს. ახლა კი ისეთი პრობლემები აქვთ, რომელსაც ვერც წარმოიდგენდნენ“ - განაცხადა ტრამპმა.

აღნიშნულმა განცხადებამ სოციალურ ქსელებში დიდი გაუგებრობა გამოიწვია, რადგან შვედეთში „მომხდარი ტერაქტის“ შესახებ ინფორმაციას არავინ ფლობდა - არც ქვეყნის ხელისუფლება, არც სამართალდამცავი უწყებები, არც მოსახლეობა და არც მედია.

განცხადებას, შვედეთის ყოფილი პრემიერი კარლ ბილდტი გამოეხმაურა.

„შვედეთი? ტერორისტული აქტი? რა მოწია? კითხვა ბევრია“ - დაწერა ბილდტმა თვითერზე.

ტრამპის განცხადების გამო, შვედეთის საელჩომ აშშ-ში სახელმწიფო დეპარტამენრს განმარტება სთხოვა.

ერთ-ერთი ვერსიით, ტრამპი შეცდომაში Fox News-ზე გასულმა დოკუმენტურმა ფილმმა შეიყვანა, სადაც საუბარი იყო, როგორ გაიზარდა შვედეთში კრიმინალის სტატისტიკა მიგრანტებისთვის კარის გაღების შემდეგ.