"სამხრეთ კავკასიის რეგიონი "ბოევიკების", ტერორისტებისა და ნარკომოვაჭრეების მარშრუტი ხდება. საჭიროა ქართველ სამართალდამცავებთან თანამშრომლობის აღდგენა"

"სამხრეთ კავკასიის რეგიონი "ბოევიკების", ტერორისტებისა და ნარკომოვაჭრეების მარშრუტი ხდება. საჭიროა ქართველ სამართალდამცავებთან თანამშრომლობის აღდგენა" - ლავროვი

მსოფლიო - 12:17, 21 Feb, 2017

2991

რუსეთის საგარეო საქმეთა მინისტრის სერგეი ლავროვმა საქართველოსთან უვიზო რეჟიმის დაბრუნებას რთული საკითხი უწოდა, თუმცა აღნიშნა, რომ „ცოტა უცნაურია“ ამ საკითხის განხილვა არარსებული დიპლომატიური ურთიერთობის ფონზე.

როგორც გამოცემა „ტასსი“ იტყობინება, ამის შესახებ ლავროვმა მიუნხენის უსაფრთხოების კონფერენციაზე ისაუბრა.

ლავროვმა ტერორისტების მიერ სამხრეთ კავკასიის რეგიონის მარშრუტის გამოყენების საფრთხეზე ისაუბრა და განაცხადა, რომ ასეთ პირობებში სავიზო რეჟიმის გაუქმება როგორც დიპლომატიური ურთიერთობების, ისე უსაფრთხოების საკითხებს უკავშირდება.

"ეს ასევე დაკავშირებულია უსაფრთხოების უზრუნველყოფასთან იმ პირობებში, როდესაც არამარტო ცენტრალური აზია, არამედ სამხრეთ კავკასიის რეგიონი ხდება მარშრუტი, რომლის გამოყენებასაც აქტიურად ცდილობენ „ბოევიკები“, ექსტრემისტები, ტერორისტები და ნარკომოვაჭრეები. როცა დავალაგებთ სრულფასოვან ურთიერთობებს რუს და ქართველ სამართალდამცველ ორგანოებს შორის, ამ რისკების მინიმალიზებისთვის, ალბათ, შესაძლებელი იქნება საუბარი სავიზო რეჟიმის შემდგომ შემსუბუქებაზე" - განაცხადა ლავროვმა.