რუსეთის საპატრიარქოს საგარეო ურთიერთობების განყოფილების წარმომადგენლის, დეკანოზ იგორ იაკიმჩუკის განცხადებით, სრულიად საქართველოს კათოლიკოს-პატრიარქის ილია მეორის შესაძლო მოწამვლის ისტორია საკმაოდ უცნაურია.

„რაც შეეხება ამ კონკრეტულ შემთხვევას, აუცილებლად უნდა დაველოდოთ გამოძიების შედეგებს. მთლიანად ეს ისტორია საკმაოდ უცნაურია, იმის გათვალისწინებით, რომ კათოლიკოს-პატრიარქი ილია მეორე სამკურნალოდ საქართველოს ტერიტორიაზე არ იმყოფება“ - განაცხადა იაკიმჩუკმა.

მისი თქმით, „რთულია, მსგავსი შემთხვევების გახსენება ისტორიიდან,“ განსაკუთრებით ბოლო საუკუნეში.

სასულიერი პირის თქმით, რუსული ეკლესიისთვის ჯერჯერობით ნათელი არ არის ინფორმაცია მოწამვლის მცდელობის შესახებ სიმართლეა, თუ „საინფორმაციო ომის ნაწილია.“

რუსეთის საპატრიარქოს წარმომადგენლის განცხადებით, ილია მეორე მოსკოვის სასულიერი სემინარიისა და აკადემიის კურსდამთავრებულია, ამიტომ ყოველთვის ინარჩუნებდა „კარგ დამოკიდებულებას რუსული ეკლესიისადმი.“

„ორ ქვეყანას შორის არსებულ ყველაზე კრიტიკულ მომენტშიც, ეკლესიების კავშირი არ დაზარალებულა. უფრო მეტიც, კიდევ უფრო გაძლიერდა“ - განაცხადა იამჩუკმა.