"ეს არ არის აკრძალვა მუსლიმებისთვის... საქმე რელიგიას არ ეხება" - ტრამპი სავიზო გადაწყვეტილებას განმარტავს

მსოფლიო - 14:26, 30 Jan, 2017

8807

აშშ-ის პრეზიდენტი დონალდ ტრამპი მედიას მიგრანტებთან დაკავშირებით მისი გადაწყვეტილების არასწორ ინტერპრეტაციაში ადანაშაულებს და აცხადებს, რომ მისი განკარგულება ყველა მუსლიმისთვის აშშ-ში შესვლის აკრძალვას არ ნიშნავს .

ამის შესახებ თეთრი სახლის მიერ გავრცელებულ განცხადებაშია საუბარი.

“ამერიკა ყოველთვის იყო თავისუფალი და მამაცი ადამიანების სამშობლო. ჩემი პოლიტიკა მსგავსია პრეზიდენტ ობამას ბოლიტიკისა, როდესაც 2011 წელს მან ერაყელი ლტოლვილებისთვის ვიზების გაცემა 6 თვით აკრძალა.

მინდა განვმარტო, რომ ეს არ არის აკრძალვა მუსლიმებისთვის, როგორც მედია მცდარად იუწყება. საქმე რელიგიას არ ეხება - საქმე ტერორიზმსა და ჩვენი ქვეყნის უსაფრთხოდ ქცევას ეხება. არსებობს 40-ზე მეტი სხვადასხვა ქვეყანა, რომელთა მოსახლოების უმრავლესობა მუსლიმია, თუმცა მათზე ამ ზომას არ უმოქმედია.

ჩვენ კვლავ განვაახლებთ ვიზების გაცემას 90 დღის შემდეგ, მანამ კი დარწმუნებულები ვართ, შევიმუშავებთ და ავამოქმედებთ უსაფრთხო პოლიტიკას” - ნათქვამია განცხადებაში.

შეგახსენებთ, ტრამპის განკარგულების თანახმად, 7 მუსლიმური ქვეყნის - სირიის, ერაყის, ირანის, ლიბიის, სომალის, სუდანისა და იემენის მოქალაქეებისათვის ამერიკული ვიზების გაცემის შეჩერების ბრძანება გასცა.
ამერიკის სამოქალაქო უფლებების დაცვის კავშირის (ACLU) სარჩელის საფუძველზე ნიუ იორკის სასამართლომ ტრამპის განკარგულება შეაჩერა, თუმცა უშიშროების სამინისტრის განცხადებით, სასამართლოს გადაწყვეტილების მიუხედავად , აკრძალვა ძალაში რჩება.