აშშ დევნილების მიღებას 120 დღით აჩერებს - ტრამპის „საკონტროლო ზომები“

მსოფლიო - 11:03, 28 Jan, 2017

4312

ამერიკული მედიის ცნობით, აშშ-ს პრეზიდენტის დონალდ ტრამპის ახალი განკარგულებით, შეერთებული სთატები დევნილების მიღებას 120 დღით აჩერებს, სირიელი დევნილების მიღებას კი განუსაზღვრელი ვადით კრძალავს.
Christian Broadcasting Network-ისთვის მიცემულ ინტერვიუში ტრამპმა განაცხადა, რომ დევნილის სტატუსის მიღების შესახებ განაცხადების განხილვისას პრიორიტეტს სირიელ ქრისტიანებს მიანიჭებს.

„მათ სასტიკად ეპყრობიან. ისინი (ტერორისტები) ყველას თავებს კვეთდნენ, მაგრამ ყველაზე დიდი რაოდენობით ქრისტიანებს. ასე, რომ მათ, დავეხმარებით.
თუ თქვენ ხართ ქრისტიანი სირიიდან შეუძლებელია, როგორც მინიმუმ ძალიან რთულია, აშშ-ში მოხვედრა. თუ თქვენ მუსლიმი ხართ, ეს შესაძლებელი იყო, მაგრამ თუ ქრისტიანი ხართ, ეს თითქმის შეუძლებელი იყო“, - განაცხადა მან.

ამასთან, ტრამპის განკარგულებაში განსაზღვრულია დევნილების მაქსიმალური რაოდენობა, რომელთა მიღება მიმდინარე ფინანსურ წელს (რომელიც 30 სექტემბერს სრულდება) იქნება შესაძლებელი და ეს რაოდენობა 50 000-ით არის განსაზღვრული.

აშშ-ის სახელმწიფო დეპარტამენტის მონაცემებით, 2016 წლის ოქტომბრიდან, როდესაც ფინანსური წელი დაიწყო, აშშ-მა უკვე მიიღო 30 000 დევნილი. შესაბამისად, დარჩენილ პერიოდში აშშ 20 000 დევნილს მიიღებს.