ირანელი მსახიობი ტრამპის მიერ ვიზებზე დაწესებული შეზღუდვების გამო ოსკარს ბოიკოტს უცხადებს

მსოფლიო - 12:38, 27 Jan, 2017

4549

ირანელი მსახიობი თარანე ალიდუსტი, რომელიც ოსკარზე ნომინირებულ ფილმში ქალის მთავარ როლს ასრულებს, ოსკარის დაჯილდოებას ბოიკოტს უცხადებს და პროტესტის ნიშნად არ დაესწრება.

ბოიკოტის მიზეზად აშშ-ის პრეზიდენტის, დონალდ ტრამპის მიერ ვიზებზე მიღებული შეზღუდვები დაასახელა.

„ტრამპის მიერ ირანის მოქალაქეებისთვის ვიზის აკრძალვა - რასისტულია. მიუხედავად იმისა, იქნება ეს კულტურული ღონისძიება თუ არა, პროტესტის ნიშნად კინოაკადემიის 2017 წლის დაჯილდოებას მე არ დავესწრები” - წერს მსახიობი თვითერზე.

შეგახსენებთ, გავრცელდა ინფორმაცია, რომ უახლოეს დღეებში ტრამპი სირიის, ერაყის, ირანის, ლიბიის, სომალის, სუდანისა და იემენის მოქალაქეებისათვის ამერიკული ვიზების გაცემის შეჩერებაზე განკარგულებას გასცემს

ცნობილი ირანელი რეჟისორის ასღარ ფარჰადის ფილმი „გაყიდვების აგენტი“ (The Salesman), რომელშიც თარანე მთავარ როლს ასრულებს, საუკეთესო უცხოური ფილმის ნომინაციაშია წარდგენილი. აღსანიშნავია, რომ ფარჰადიმ ოსკარი 2012 წელს ფილმისთვის A Separation აიღო.

ოსკარის რიგით 89-ე დაჯილდოების ცერემონიალი 26 თებერვალს, ტრადიციულად ლოს ანჯელესში, „დოლბის“ თეატრში გაიმართება.

წელს, ოსკარის დაჯილოდებას ცნობილი ამერიკელი კომიკოსი და ტელეწამყვანი ჯიმი კიმელი უმასპინძლებს.