მექსიკის პრეზიდენტმა ენრიკე პენია ნიეტომ აშშ-მექსიკის საზღვარზე კედლის მშენებლობის შესახებ პრეზიდენტ დონალდ ტრამპის გადაწყვეტილება დაგმო და კიდევ ერთხელ განაცხადა, რომ მექსიკა კედლის მშენებლობისთვის ფულს არ გადაიხდის.

მისი თქმით, ის გმობს და ძალიან წუხს ტრამპის გადაწყვეტილების გამო და აღნიშნა, რომ „მექსიკას კედლების არ სჯერა.“

ნიეტომ დასძინა, რომ ის ყველაფერს გააკეთებს, რათა აშშ-ის ტერიტორიაზე მაცხოვრებელი მექსიკის მოქალაქეების უფლებები დაიცვა.

"მექსიკა ადასტურებს თავის მეგობრობას აშშ-ის ხალხთან და სურვილს შეთანხმებას მიაღწიოს აშშ-ის მთავრობასთან, რომელიც მექსიკისა და მექსიკელი ხალხის ინტერესებში იქნება“ - აღნიშნა ნიეტომ.

ჯერჯერობით უცნობია, გააუქმებს თუ არა მექსიკის პრეზიდენტი ვაშინგტონში დაგეგმილ ვიზიტს, რომელიც 31 იანვარს არის ჩანიშნული.

შეგახსენებთ, 25 იანვარს, დონალდ ტრამპმა ხელი მოაწერა განკარგულებას, რომელის მექსიკის საზღვართან კედლის აშენებას ითვალისწინებს.

ტრამპის თქმით, კედლის მშენებლობა მაშინ დაიწყება, როგორც კი ეს ფიზიკურად შესაძლებელი გახდება. თუმცა, მას ამისთვის კონგრესის თანხმობა სჭირდება.

მექსიკის საზღვარზე კედლის აშენება ტრამპის საარჩევნო კამპანიისას ერთ-ერთი მთავარი დაპირება იყო, რასაც საზოგადოებისა და პოლიტიკოსების აღშფოთება მოჰყვა.

მაშინ ტრამპმა განაცხადა, რომ ეს იქნებოდა „დიდებული, ლამაზი კედელი,“ რომლის მშენებლობისთვისაც ფულს არა ამერიკა, არამედ მექსიკა გადაიხდიდა.

მექსიკის პრეზიდეტმა კედლის მშენებლობის დაფინანსებაზე უარი განაცხადა, რის შემდეგაც ტრამპმა განაცხდა, რომ ამისთვის ფინანსებს აშშ გამოყოფდა.