პროკურატურის ინფორმაციით, დაკავებულნი არიან შსს-ს ყოფილი თანამშრომლები: გოჩა ბაღათრიშვილი, გოჩა ჩიტაია, ზაზა ჭაია, გრიგოლ კვინიკაძე, ვლადიმერ გამრეკლიშვილი და გივი გრავჩენკო, პროკურატურის მიერ გავრცელებულ განცხადებაში კი ნათქვამია:

"მტკიცებულებათა ფალსიფიკაციის, განზრახ უკანონო დაკავებისა და სამსახურეობრივი უფლებამოსილების ბოროტად გამოყენების ფაქტზე დაკავებულები არიან შსს-ის ყოფილი თანამშრომლები".

"გამოძიებით დადგენილია, რომ 2011 წლის 11 ოქტომბერს ზემოაღნიშნულმა პირებმა თბილისში, კოსტავას გამზირზე მდებარე საცხოვრებელი კორპუსის ეზოში ჩხრეკისა და დაკავების კანონიერი საფუძვლების არარსებობის მიუხედავად, ფალსიფიცირებული მტკიცებულების საფუძველზე, პირადი ღირსების შეურაცხყოფით უკანონოდ დააკავეს პოლიციის გენერალი თამაზ თამაზაშვილი", - განაცხადა მთავარი პროკურატურის პრესსამსახურის უფროსმა ხათუნა პაიჭაძემ საგანგებო პრესკონფერენციაზე.

მისივე განმარტებით, დაკავებული პირების დანაშაული სასჯელის სახით 5-დან 8 წლამდე თავისუფლების აღკვეთას ითვალისწინებს.

შეგახსენებთ, რომ ბოლო ორი დღეა, ყოფილი სამართალდამცავები პროკურატურასთან ბრიფინგს მართავდნენ. ყოფილი სამართალდამცავები პროკურატურას ზეწოლაში ადანაშაულებენ. მათი თქმით, პროკურატურაში აიძულებდნენ, თამაზ თამაზაშვილის საქმეში თავი დამნაშავედ ცნონ.

ერთერთმა მათგანმა გრიგოლ კვინიკაძემ, გუშინ განაცხადა: "მთავარი პროკურატურიდან დაგვიკავშირდნენ ჩვენს კუთვნილ მობილურ ტელეფონებზე. 10–12 თანამშრომელს, რომლებიც 2011 წლის ოქტომბრის თვეში იღებდნენ მონაწილეობას თამაზ თამაზაშვილის დაკავების ღონისძიებაში. პროკურატურა გველაპარაკა ულტიმატუმის სახით, რომ თუ რომელიმე ჩვენთაგანი ან აიღებდა საკუთარ თავზე არარსებულ დანაშაულს, წინააღმდეგ შემთხვევაში ყველას დააკავებდნენ."

ყოფილი თანამშრომლები განმარტავენ, რომ ბოლო რამდენიმე თვის განმავლობაში მათ საგამოძიებო ორგანოში იბარებენ და არარსებული ფაქტის აღიარებას სთხოვენ.

მათი გუშინდელი განცხადებით, პროკურატურამ 24 საათი მისცა, რათა 12–დან რომელიმეს საკუთარ თავზე აეღო და ეღიარებინა, წინააღმდეგ შემთხვევაში ყველას დაჭერით დაემუქრნენ.