ტრამპმა მექსიკის საზღვარზე კედლის აშენების განკარგულება გამოსცა

მსოფლიო - 11:00, 26 Jan, 2017

5934

25 იანვარს, ამერიკის პრეზიდენტმა დონალდ ტრამპმა საიმიგრაციო პოლიტიკის გამკაცრებისკენ მიმართულ განკარგულებებს მოაწერა ხელი, რომელთაგანაც ერთერთი მექსიკის საზღვართან კედლის აშენებას ითვალისწინებს.

განკარგულებებზე ხელმოწერა ეროვნული უსაფრთხოების დეპარტამენტში გამართულ ცერემონიაზე მოხდა.

მათი მიხედვით, უნდა შეიქმნას მეტი დაკავების ცენტრი და გაიზარდოს სასაზღვრო კონტროლის აგენტების რაოდენობა. ასევე, ფედერალურ ფინანსებთან წვდომა შეეზღუდება დოკუმეტების არ მქონე ემიგრანტების “თავშესაფარ ქალაქებს“, ისეთებს, როგორიცაა ვაშინგტონი, ლოს-ანჯელესი და სან-ფრანცისკო.

ტრამპის თქმით, კედლის მშენებლობა მაშინ დაიწყება, როგორც კი ეს ფიზიკურად შესაძლებელი გახდება. თუმცა, მას ამისთვის კონგრესის თანხმობა სჭირდება.

მექსიკის საზღვარზე კედლის აშენება ტრამპის საარჩევნო კამპანიისას ერთ-ერთი მთავარი დაპირება იყო, რასაც საზოგადოებისა და პოლიტიკოსების აღშფოთება მოჰყვა.

მაშინ ტრამპმა განაცხადა, რომ ეს იქნებოდა „დიდებული, ლამაზი კედელი,“ რომლის მშენებლობისთვისაც ფულს არა ამერიკა, არამედ მექსიკა გადაიხდიდა.

მექსიკის პრეზიდეტმა კედლის მშენებლობის დაფინანსებაზე უარი განაცხადა, რის შემდეგაც ტრამპმა განაცხდა, რომ ამისთვის ფინანსებს აშშ გამოყოფდა.