"ექსპორტის ზრდასთან ერთად გაიზარდა იმპორტიც, რამაც გააუარესა წმინდა ექსპორტი"- გვენეტაძე ეკონომიკურ მაჩვენებლებზე

ბიზნესი & ეკონომიკა - 14:32, 25 Jan, 2017

1596

ეროვნული ბანკი წელს მაღალ ინფლაციას ვარაუდობს, რაც გაზრდილ აქციზებს და ლარის კურსის მერყეობას უკავშირდება. სწორედ ამ მიზეზების გათვალისწინებით დღეს სებ-მა მონეტარული პოლიტიკის განაკვეთი 25 საბაზისო პუნქტით 6.75 პროცენტამდე გაზარდა. ეროვნული ბანკი არ გამორიცხავს რომ წელს რეფინანსირების განაკვეთი კიდევ 25 პუნქტით 7%-მდე გაიზარდოს. იმ შემთხვეაში კი თუ ინფლაციის შემცირებას ექნება ადგილი სებ-ი განაკვეთსაც შესაბამისად შეამცირებს. დღეს გამართულ პრესკონფერენციაზე ეროვნული ბანკის პრეზიდენტმა კობა გვენეტაძემ ქვეყნის ეკონომიკურ მაჩვენებლებზეც ისაუბრა.

„თუ გადავხედავთ საგარეო სექტორს პოზიტიური ტენდენციები გამოიკვეთა ექსპორტის მიმართულებით. 2016 წლის მე-4 კვარტალში საგარეო მოთხოვნის გაუმჯობესების შედეგად საქონლის რეგისტრირებული ექსპორტის წლიური კლება ზრდით შეიცვალა. თუმცა უნდა აღვნიშნოთ, რომ გაიზარდა იმპორტიც, რამაც გააუარესა წმინდა ექსპორტი. ზრდას განაგრძობს შემოსავლები ტურიზმიდან და 2015 წელთან შედარებით მოიმატა საქართველოში გადმორიცხული ფულადი გზავნილების რაოდენობა,“- განაცხადა კობა გვენეტაძემ.