აშშ-ის მოქმედმა პრეზიდენტმა ბარაკ ობამამ, რომელიც პრეზიდენტობას რამდენიმე საათში დაასრულებს, აშშ-ის მოქალაქეებს გამოსამშვიდობებელი წერილით მიმართა.

წერილი თეთრი სახლის ვებგვერდზე გამოქვეყნდა. წერილის დასაწყისში რედაქტორი აღნიშნავს, რომ წერილი ბარაკ ობამამ თეთრ სახლის ადმინისტრაციას, დილით, იმეილით გაუგზავნა.

„ჩემო მეგობარო ამერიკელები“ - ასე მიმართა ბარაკ ობამამ ამერიკელებს და მადლობა გადაუხადა იმისთვის, რომ მას 44-ე პრეზიდენტად ყოფნის საშუალება მისცეს.

„ყველაფერი, რაც თანამდებობაზე ყოფნისას ვისწავლე, ვისწავლე თქვენგან. თქვენი წყალობით მე გავხდი უკეთესი პრეზიდენტი, უკეთესი ადამიანი“ - წერს ობამა.

მისი თქმით, გასული 8 წლის განმავლობაში , ამერიკელი ხალხი მისთვის სიკეთის, იმედის, ძალისხმევის წყარო იყო. ბარაკ ობამა წერილში იმ სასიხარულო და სამწუხარო მოვლენებზე საუბრობს ,რომელიც ქვეყნის მოქალაქეებთან ერთად განიცადა.

აშშ-ის 44-ე პრეზიდენტი წერილში 8 წლის განმავლობაში მიღწეულ წარმატებებზე საუბრობს, როგორიცაა მიღწევები მედიცინისა და მაღალი ტექნოლოგიების სფეროში, ჯანდაცვის ხელმისაწვდომობა, ერთნაირსქესიანთა ქორწინების დაკანონება, მიგრანტების დახმარება.

პრეზიდენტი მისი მემკვიდრისთვის წერილის დატოვების ტრადიასაც ახსენებს,

„ამ წერილის მიზანია იმის გაზიარება, რაც ჩვენ ვიცით, რაც ვისწავლეთ, იმ პატარა სიბრძნის, რომელიც დაეხმარება ჩვენს მემკვიდრეს გაუმკლავდეს იმ დიდ პასუხისმგებლობას, რასაც ჩვენი ქვეყნის უმაღლესი თანამდებობა, ასევე თავისუფალ სამყაროში ლიდერობა ჰქვია“ - წერს ბარაკ ობამა.

ბარაკ ობამა ამერიკელებს მოუწოდებს, განურჩევლად მათი პოლიტიკური შეხედულებებისა, იყვნენ პატიოსანი მოქალაქეები.

„მე თქვენთან ვიქნები გზის ნებისმიერ მონაკვეთში.

და როდესაც მოგეჩვენებათ, რომ პროგრესი შენელდა, გახსოვდეთ: ამერიკა - ეს ერთი ადამიანის პროექტი არ არის. არსებობს ერთი, ყველაზე ძლიერი სიტყვა ჩვენს დემოკრატიაში: სიტყვა „ჩვენ.“ ჩვენ - ხალხი. ჩვენ გადავლახავთ ყველაფერს.

დიახ, ჩვენ შეგვიძლია."

შეგახსენებთ, ბარაკ ობამას პრეზიდენტობის ვადა დღეს ეწურება. დონალდ ტრამპის იაუგურაციის შემდეგ ობამები თეთრ სახლს დატოვებენ.