მმართველ გუნდში დარწმუნებულნი არიან, რომ აღნიშნული პროგრამა მათ, ვინც ხელფასს ლარში იღებს, შეღავათს მისცემს. თუმცა ლარიზაციის პროგრამას ოპოზიციასთან ერთად, ეკონომიკის ექსპერტებიც სკეპტიკურად უყურებენ.

„ნიუპოსტთან“ საუბრისას "საზოგადოება და ბანკების გამგეობის" ხელმძღვანელი გიორგი კეპულაძე აცხადებს, რომ გალარების პროგრამა თითოეული სესხის შემთხვევაში ინდივიდუალურია და ადამიანმა გარკვეული პირობების გათვალისწინებით უნდა განსაზღვროს უღირს თუ არა ამ პროგრამაში ჩართვა:

„გალარების აქცია ეხება დაახლოებით 27 ათას მომხმარებელს, ცალსახად შეფასება, რომ ყველას წაადგება ან არავის გამოადგება არ შეიძლება, პირობები ინდივიდუალურია და თითოეულმა მომხმარებელმა თავად უნდა გადაწყვიტოს უღირს თუ არა სესხის დოლარიდან ლარში გადატანა, დათვალოს მიმდინარე ხარჯები, დათვალოს სესხის ვადა, ასევე რამდენი აქვს დარჩენილი ძირი თანხა, რამდენ პროცენტში აქვს და რა პირობებს შესთავაზებს ბანკი - ამის შემდეგ უნდა მიიღოს გადაწყვეტილება. ვიღაცისთვის ეს შეიძლება იყოს კარგი დოლარიდან ლარში გადატანა, როგორც მინიმუმ ყველა ამ ნაბიჯით დააზღვევს სავალუტო კუსკს და აირიდებს თავიდან. თუ ვინმე დამოუკიდებლად ვერ მოახერხებს ამას, ჩვენი ორგანიზაცია "საზოგადოება და ბანკები" უფასო კონსულტაციას სთავაზობს, ასევე მუშაობს ცხელი ხაზი, სადაც შეუძლიათ მოგვმართონ და ჩვენ გავუწევთ უფასო კონსულტაციას კონკრეტულად მათ კრედიტთან დაკავშრებით“, - აცხადებს კეპულაძე.

მისივე თქმით, გალარების პროგრამა არის ერთჯერადი სოციალური აქცია, რომელიც ეროვნული ვალუტის კურსის დასტაბილურებაზე განსაკუთრებულ გავლენას ვერ მოახდენს:

„გალარების პროგრამა არის ერთჯერადი სოციალური აქცია, მისგან განსაკუთრებულ ეკონომიკურ ეფექტებს არ ველოდები, ეს ლარის კურსს არც გაამყარებს და არც გააუფასურებს, ეს არის სოციალური აქცია იმ ადამიანებისთვის, ვისაც აქვს სესხი და ბოლო 4 წლის განმავლობაში 10 დოლარი გაძვირდა 10 ლარით, შესაბამისად ყველა ამ ადამიანს მნიშვნელოვნად გაეზარდა ყოველთვიური შესატანი. ქვეყნისთვის ეს განსაკუთრებულს ვერაფერს მოიტანს და არც უნდა გვქონდეს გადაჭარბებული მოლოდინები, რომ გალარების აქციის შემდეგ ქვეყნის ეკონომიკას ეშველება.

საბოლოო ჯამში გათვლილია ისე, რომ თითქოს ის ადამიანები, ვინც გადაიტანენ დოლარიდან ლარში, ისინი თუ ყოველთვიურად არ შეიძენენ იმ რაოდენობის დოლარს, შესაძლებელია ამან ერთგვარად შეამციროს ზეწოლა ლარზე. თანხობრივად და არც რაოდენობრივად არ არის ის რიცხვი, რომელიც მნიშვნელოვან გავლენას მოახდენს ვალუტის კურსზე“, - აღნიშნავს გიორგი კეპულაძე.