39 წლის ირლანდიელი მსახიობი ჯონათან რის მაიერსი და მისი მეგობარი ქალი 30 წლის ამერიკელი მსახიობი მარა ლეინი მილოცვებს იღებენ. ისინი პირველად გახდნენ მშობლები. წყვილს ბიჭი შეეძინა. მათ შვილი ჯერ კიდევ 15 დეკემბერს გაუჩნდათ, თუმცა ცნობილი ამის შესახებ მხოლოდ ახლა გახდა. მშობლებმა შვილისთვის არაორდინალური სახელის „ვოლფ“-ის დარქმევა გადაწყვიტეს, რაც ინგლისურად მგელს ნიშნავს. არაორდინალური იყო მარას მშობიარობაც, მან სამშობიაროს ნაცვლად ბავშვი სახლში, ბებიაქალის დახმარებით გააჩინა.
მარა ლეინის ორსულობის შესახებ ინფორმაცია გასული წლის სექტემბერში გავრცელდა მას შემდეგ , რაც მსახიობმა სოციალურ ქსლეში ამის დამადასტურებელი ფოტოები გაავრცელა, თუმცა ბავშვის მამის ვინაობა მხოლოდ მოგვიანებით გაამხილა. მედია საუბრობდა იმის შესახებაც, რომ მარა და ჯონათანი საიდუმლოდ დაქორწინდნენ, თუმცა ოფიციალური ინფორმაცია მათი ქორწინების შესახებ ამ დრომდე არ გავრცელებულა.

წყვილმა შეხვედრები 2014 წლიდან დაიწყო და მალევე ნიშნობის შესახებაც განაცხადეს. მარა მუდმივად იყო ჯონათანის გვერდით ბოლო წლების განმავლობაში და დაეხმარა ალკოჰოლურ დამოკიდებულებასთან ბრძოლაში, მაშინ როდესაც მაიერსი მკურნალობის მორიგ კურსს გადიოდა.