ყირგიზეთის მოქალაქე იახია მაშრაპოვი, რომელიც ახალი წლის ღამეს სტამბულის ღამის კლუბში ტერაქტის მოწყობაშია ეჭვმიტანილი, აცხადებს, რომ მას ამ ფაქტთან არავითარი კავშირი არ აქვს, წერს ყირგიზული ინტერნეტგამოცემა turmush.kg.

გამოცემა იტყობინება, რომ იგი 3 იანვარს 07:00 საათზე ჩამოფრინდა თურქეთიდან, ხოლო 09:00 საათზე ბიშკეკიდან ქალაქ ოშას აეროპორტში დაეშვა.

ინტერნეტში გავრცელებული ინფორმაციის თანახმად, მაშრაპოვის სახლში ყირგიზეთის უშიშროების სამსახური მივიდა და იგი ადგილობრივ ქვეგანყოფილებაში გადაიყვანა, სადაც ეჭვმიტანილი დაკითხეს.

როგორც ეჭვმიტანილი აცხადებს, იგი ტერაქტთან კავშირში არ არის და ის უკვე დაკითხეს თურქეთის შესაბამისმა სამსახურებმა, რადგან იგი ჰგავდა ტერაქტში ეჭვმიტანილ პიროვნებას,

"მე ბიშკეკიდან სტამბულში 1 იანვარს ჩავფრინდი, სადაც ვაჭრობასთან დაკავშირებული საქმეები მქონდა მოსაგვარებელი. მერე აეროპორტში გავემგზავრე და თვითმფრინავში ჩავჯექი, რომლიდანაც თურქეთის სამართალდამცავებმა ჩამომსვეს. მათ ერთი საათის განმავლობაში დამკითხეს, რის გამოც თვითმფრინავის გამოფრენა ერთი საათით შეფერხდა. მათ მითხრეს, რომ მე ვგავარ ფოტოზე გამოსახულ ეჭვმიტანილს, ბოდიში მომიხადეს და გამომიშვეს," - აცხადებს მაშრაპოვი.

იგი ამბობს, რომ ტერაქტში ეჭვმიტანილი პიროვნება არასდროს უნახავს და მნას არ იცნობს, ხოლო 31 დეკემბერს იგი ყირგიზეთში იმყოფებოდა. ამას ადასტურებს მის პასპორტში გაკეთებული აღნიშვნებიც. მაშრაპოვი თურქეთში 28 დეკემბერს ჩაფრინდა, ხოლო სამშობლოში 30 დეკემბერს დაბრუნდა. მორიგი გამგზავრება თურქეთში 1 იანვარს მოხდა, საიდანაც 3 იანვარს დაბრუნდა. მისი განმარტებით, იგი ხშირად დაფრინავს თურქეთში, რადგან ყირგიზეთში იგი ერთერთ ბაზრობაზე ვაჭრობს.