საპატრიარქო გულისტკივილს გამოთქვამს 17 მაისს განვითარებულ მოვლენებთან დაკავშირებთ და ,,იდენტობის" აქციას პროვოკაციად აფასებს, საპატრიარქო შეისწავლის ყველა ამ ფაქტს და შესაბამის რეაგირებას მოახდენს:

,,საქართველოს საპატრიარქო გამოთქვამს გულისტკივილს იმ მოვლენების გამო, რაც მოხდა არასამთავრობო ორგანიზაცია ,,იდენტობის" მიერ ა.წ. 17 მაისს თბილისში დაგეგმილი აქციის ჩატარების მცდელობისას, რომელსაც ჩვენი აზრით პროვოკაციის ხასიათი ჰქონდა. ქვეყანაში სადაც მოსახლეობის აბსოლუტური უმრავლესობა ქრისტიანული და სხვა იუდეური, მუსლიმური სარწმუნოების მიმდევარია, ამგვარი აქციები მოსახლეობის მიერ ჰომოსექსუალიზმის პროპაგანდად აღიქმება, რაც მათ სამართლიან პროტესტს იწვევს. მითუმეტეს, როცა აქციის ორგანიზატორებმა და მონაწილეებმა არაფერს გაუწიეს ანგარიში, შეარჩიეს ის დრო და ადგილი, რომელიც ჩვენს ისტორიულ მეხსიერებასთან და ტრადიციასთან ძლიერ ემოციურ კავშირშია. ეს კი გამაღიზიანებელ, მაპროვოცირებელ ფაქტორად იქცა. ქვეყანა ვერ შეეგუება ცოდვის ლეგალიზებას, ეკლესიას ადამიანი უყვარს, მაგრამ ისევ ადამიანის სიყვარულიდან გამომდინარე ებრძვის ცოდვას მისი სულის გადასარჩენად. მიუხედავად ამისა, ძალადობას გამართლება არ აქვს. ჩვენ ცალსახად ვემიჯნებით მომიტინგეთა ნაწილის აგრესიულ ქმედებებს, რომელიც არც სამართლებრივ და არც სარწმუნოებრივ ნორმის ფარგლებში არ ჯდება. სამწუხაროა, რომ ამ პროცესებში სასულიერო პირებიც მონაწილეობდნენ, ამ ერთეულმა ადამიანებმა მთელს ეკლესიას მიაყენეს ზიანი. საპატრიარქო შეისწავლის მათ ქმედებებს და ჩვენის მხრიდნაც მივიღებთ შესაბამის ზომებს. უნდა აღინიშნოს ის ფაქტიც - რომ არა სასულიერო პირების უდიდესი ნაწილის ძალისხმევა და პოლიციის თანამშრომელთა თავდადებული ქმედება, შედეგები გაცილებით მძიმე იქნებოდა", - ნათქვამია საპატრიარქოს ოფიციალურ განცხადებაში.