პატრიარქის თქმით, მიუღებელია ის იდეები, რის დანერგავსაც ცდილობენ, მაგრამ არ არ შეიძლება შეურაცყოფა მივაყენოთ სხვას.
"ჩვენ გვაწუხებს, როცა განსაცდელი მოდის ჩვენთან, სინამდვილეში ჩვენ უნდა ვხარობდეთ, როდესაც უფალი გვიგზავნის განსაცდელს. წმინდა მამები გოდებდნენ და ტიროდნენ, როდესაც განსაცდელი არ ჰქონდათ. რაც მოხდა 17 მაისს, სამწუხაროა. ყოვლად მიუღებელია ის იდეები, რაც უნდათ დანერგონ საქართველოში, მაგარმ ძალიან სამწუხაროა ისიც, რომ ქართველი სამღვდელოება უზრდელად იქცეოდა. მინდა ყველას მოვუწოდო სიმშვიდისკენ. არ შეიძლება შეურაცხყოფა მივაყენოთ სხვას. ბოროტებას მხოლოდ სიკეთე და სიყვარული კურნავს", _ აღნიშნა უწმინდესმა.

კათოლიკოს-პატრიარქმა ქადაგებისას სტამბულში მისი ვიზიტის შესახებაც ისაუბრა და აღნიშნა, რომ შეხვდნენ მსოფლიო პატრიარქს და წმინდა სინოდის წევრებს.

როგორც უწმინდესმა ბრძანა, საუბარი შეეხო ბიჭვინთისა და ცხუმ-აფხაზეთის ეპარქიას. ამ საკითხთან დაკავშირებით საუბრის დროს მიმდინარეობდა კამათი. საქართველოს მართლმადიდებელი ეკლესია ამტკიცებდა, რომ აფხაზეთი საქართველოს ნაწილია.
,,ეს იყო ბრძოლა. ჩვენ ვიცავდით საქართველოს ეკლესიას, ჩვენ ვამტკიცებდით, რომ აფხაზეთი საქართველოს ძირძველი ნაწილია, რომ ცხუმ-აფხაზეთის ეპარქია არის ძირძველი ეპარქია. მსოფლიო პატრიარქმა რამდენჯერმე დაადასტურა, რომ სცნობს აფხაზეთის ეპარქიას საქართველოს ტერიტორიის კანონიერ ნაწილად. ხანდახან ამ საკითხზე საუბარი კამათში გადადიოდა, ხანდახან - მშვიდობიან საუბარში. საბოლოოდ, შევთანხმდით, რომ სამღვდელოება იყოს იქ გაგზავნილი", –აღნიშნა პატრიარქმა.