აშშ 35 რუს დიპლომატს ქვეყნიდან აძევებს - ბარაკ ობამამ რუსეთის წინააღმდეგ სანქციები დააწესა

მსოფლიო - 12:13, 30 Dec, 2016

6237

ოფიციალურმა ვაშინგტონმა რუსეთის წინააღმდეგ ახალი სანქციების დაწესების შესახებ განაცხადა, რომლის მიხედვითაც შტატების ხელისუფლებამ ვაშინგტონიდან და სან-ფრანცისკოდან 35 რუსი დიპლომატის გაძევების გადაწყვეტილება მიიღო.

თეთრი სახლის მიერ გავრცელებული განცხადების თანახმად, სანქციები მოსკოვში ამერიკელი დიპლომატების მიმართ მტრული კამპანიის წარმოებისთვის საპასუხო ზომებს წარმოადგენს.

აშშ-ის ხელისუფლება დაკეტავს მერილენდსა და ნიუ-იორკში მდებარე დაწესებულებებს, სადაც რუსი დიპლომატები მოღვაწეობდნენ, შეერთებული შტატების ინფორმაციით, ეს დაწესებულებები დაზვერვის მონაცემების მოსაპოვებლად გამოიყენებოდა. ახლა დიპლომატებს 72 საათი აქვთ ქვეყნის დასატოვებლად.

აშშ-ის ფინანსთა სამინისტროს ვებგვერდზე გამოქვეყნებული სანქციები ექვს პირსა და ხუთ უწყებას ეხება, მათ შორისაა რუსეთის მთავარი სადაზვერვო სამმართველოს უფროსი იგორ კორობოვი და მისი მოადგილეები ვლადიმერ ალექსეევი და სერგეი გიზუნოვი.

რამდენიმე დღის წინ ცნობილი გახდა, რომ ცნობილი გახდა, რომ 2016 წლის საპრეზიდენტო არჩევნებში ჩარევის გამო აშშ რუსეთისთვის სანქციების დაწესებას აპირებდა.

შეერთებული შტატების ხელისუფლებამ წინასაარჩევნო პერიოდში განხორციელებულ კიბერთავდასხმებში რუსი ჰაკერები დაადანაშაულა და განაცხადა, რომ შეტევის მიზანი საპრეზიდენტო არჩევნებზე გავლენის მოხდენა იყო, რასაც ოფიციალური მოსკოვი კატეგორიულად უარყოფს.

2015 წლის მარტში დემოკრატიული პარტიის შტაბის კომპიუტერულ ქსელზე კიბერშეტევა განხორციელდა, რის შემდეგაც ჰილარი კლინტონის იმეილების სკანდალი დაიწყო, რომლის თანახმადაც კლინტონი სახელმწიფო მდივნობისას ოფიციალური მიმოწერისთვის პირად ელექტრონულ ფოსტას იყენებდა.