რუსეთი შესაბამის პასუხს გასცემს აშშ-ის მიერ ახალი სანქციების დაწესებას

რუსეთი შესაბამის პასუხს გასცემს აშშ-ის მიერ ახალი სანქციების დაწესებას - მარია ზახაროვა

მსოფლიო - 12:42, 29 Dec, 2016

3933

რუსეთის საგარეო საქმეთა სამინისტროს ოფიციალური წარმომადგენლის, მარია ზახაროვას განცხადებით, კრემლი შესაბამის პასუხს გასცემს, თუ აშშ რუსეთის წინააღმდეგ სანქციებს დააწესებს.

“ჩვენ დავიღალეთ “რუსი ჰაკერების” შესახებ სიცრუით. ბარაკ ობამას ადმინისტრაციამ ჯერ კიდევ ნახევარი წლის წინ დაიწყო ეს დეზინფორმაცია ნოემბრის არჩევნებში სასურველი კანდიდატისთვის ხელშეწყობის მიზნით და რადგან სასურველს ვერ მიაღწია, ეძებს მარცხის გასამართლებელ მიზეზს" - ნათქვამია მარია ზახაროვას განცხადებაში.
შეგახსენებთ, გუშინ ცნობილი გახდა, რომ 2016 წლის საპრეზიდენტო არჩევნებში ჩარევის გამო აშშ რუსეთისთვის სანქციების დაწესებას აპირებს.

როგორც ვაშინგტონ პოსტი იტყობინება, მოქმედი პრეზიდენტის ბარაკ ობამას ადმინისტრაცია საპასუხო ზომების დეტალებზე მუშაობას ასრულებს და სავარაუდოდ, ამ კვირაში ოფიციალურ განცხადებასაც გააკეთებს.

გამოცემის თანახმად, საუბარია ეკონომიკურ სანქციებსა და დიპლომატრი ურთიერთობების შეზღუდვაზე.

შეერთებული შტატების ხელისუფლებამ წინასაარჩევნო პერიოდში განხორციელებულ კიბერთავდასხმებში რუსი ჰაკერები დაადანაშაულა და განაცხადა, რომ შეტევის მიზანი საპრეზიდენტო არჩევნებზე გავლენის მოხდენა იყო, რასაც ოფიციალური მოსკოვი კატეგორიულად უარყოფს.

2015 წლის მარტში დემოკრატიული პარტიის შტაბის კომპიუტერულ ქსელზე კიბერშეტევა განხორციელდა, რის შემდეგაც ჰილარი კლინტონის იმეილების სკანდალი დაიწყო, რომლის თანახმადაც კლინტონი სახელმწიფო მდივნობისას ოფიციალური მიმოწერისთვის პირად ელექტრონულ ფოსტას იყენებდა.