შავ ზღვაში ჩავარდნილ Ту-154-ში შესაძლოა ტოტო კუტუნიოც ყოფილიყო- "ამაში ბედისწერის ხელი ურევია"

მსოფლიო - 21:35, 26 Dec, 2016

28922

სირიაში რუსულ სამხედრო ანსამბლთან ერთად კონცერტის ჩასატარებლად პოპულარული იტალიელი მომღერალი ტოტო კუტუნიოც იყო მიწვეული, ამის შესახებ იტალიური მედია წერს.

„მე შოკირებული ვარ ამ ტრაგედიით“ - განაცხადა ტოტო კუტუნიომ, ქალაქ სოჭთან მომხდარი ავიაკატასტროფის შესახებ საუბრისას, რომელმაც 92 ადამიანი, მათ შორის ალექსანდროვის სახელობის ორკესტრიც იმსხვერპლა.

კუტუნიოს თქმით მან მოწვევა კონცერტში მონაწილეობასთან დაკავშირებით ერთი თვის წინ მიიღო, ის მოსკოვში უნდა გადაფრენილიყო და შემდეგ კი იქიდან სირიაში გამგზავრებულიყო, თუმცა მას სხვა გეგმები გამოუჩნდა და უარის თქმა მოუწია. მისი თქმით "ამაში ბედისწერის ხელი ურევია".

აღნიშნულ ორკესტრთან კუტუნიოს ადრეც არაერთხელ უთანამშრომლია.

რუსეთის თავდაცვის უწყების თვითმფრინავი Ту-154 შობას, 25 დეკემბერს ქალაქ სოჭთან სანაპიროდან 14-16 კმ-ის დაშორებით, ზღვაში ჩამოვარდა. თვითმფრინავის ბორტზე 92 ადამიანი იმყოფებოდა. მათ შორის 64 ადამიანი ალექსანდროვის სახელობის სამხედრო ანსამბლის წევრი იყო, რომლებსაც სირიაში მყოფი რუსი ჯარისკაცებისთვის საახალწლო კონცერტი უნდა ჩაეტარებინათ, მათ გარდა თვითმფრინავში იმყოფებოდნენ ჟურნალისტებიც.