"ნაციონალების" მხარდამჭერები ქუთაისში, ჯავახიშვილის ქუჩაზე, სამხარეო მთავარ სამმართველოსთან მერაბიშვილისა და ჭიაბერაშვილის დაკავებას გააპროტესტებენ. ხოლო "ქართული ოცნების" წარმომადგენლები ქუთაისის საქალაქო სასამართლოსთან იკრიბებიან, სადაც აქციას გამართავენ. თუმცა ამ დროისთვის არ კონკრეტდება, რას აპროტესტებენ "ოცნების" წარმომადგენლები, ადგილზე უკვე რამდენიმე ადამიანი ცოცხით ხელში მივიდა, ერთ აქციზე ეროვნული დროშები უკავიათ, რამდენიმე მეტრში მეორე აქციაზე კი ცოცხები.

"ნაციონალების" მხარდამჭერები აცხადებენ, რომ დღეიდან ისინი მთელი ქვეყნის მასშტაბით აქციებს იწყებენ.

"მე დღეს მივდივარ ჩემი პირადი მეგობრების, მერაბიშვილისა და ჭიაბერაშვილის, უკანონო დაკავების გასაპროტესტებლად," – განაცხადა ქუთაისის ვიცე–მერმა ამირან ძოწენიძემ.

"ეს იქნება ჩვენი ლიდერის მხარდასაჭერი აქცია, რომლიც დღეიდან იწყება მთელი ქვეყნის მასშტაბით. თუ რა ფორმით ჩატარდება აქციები, ამაზე თათბირი გვექნება. მერაბიშვილს და ჭიაბერაშვილს ბევრი მხარდამჭერი ჰყავს," – აცხადებს იმერეთის გუბერნატორი ვახტანგ ბალავაძე. აღნიშნულ ინფორმაციას "ნიუპრესი" ავრცელებს.

როგორც ცნობილია, პარალელურად მიმდინარეობს ,,ნაციონალური მოძრაობის" საგანგებო სხდომა.