თავდასხმა ბერლინის საშობაო ბაზრობაზე - პოლიციამ შეცდომით სხვა ადამიანი დააკავა

თავდასხმა ბერლინის საშობაო ბაზრობაზე - პოლიციამ შეცდომით სხვა ადამიანი დააკავა - Die Welt

მსოფლიო - 18:40, 20 Dec, 2016

3702

ბერლინში, საშობაო ბაზრობაზე თავდამსხმელი პირი თავისუფალია და პოლიციამ შეცდომით სხვა ადამიანი დააკავა.

ამის შესახებ გერმანული გამოცემა Die Welt-ი იტყობინება.

როგორც გამოცემა თავდაცვის სამინისტროს ერთ-ერთ მაღალჩინოსანზე დაყრდნობით წერს, დაკავებული ეჭვმიტანილი, დიდი ალბათობით, სატვირთო მანქანის მძღოლი არ არის. თავად დაკავებულიც, რომელიც წარმოშობით პაკისტანიდან არის, მომხდართან კავშირს უარყოფს.

შეგახსენებთ, ინციდენტი ბერლინში 19 დეკემბერს, ადგილობრივი დროით 20:14 საათზე მოხდა. სატვირთო მანქანა საშობაო ბაზრობის ტერიტორიაზე შევარდა და დაახლოებით 50-80 მეტრი გაიარა. შემთხვევის შედეგად დაიღუპა 12 ადამიანი, 48 დაშავებული საავადმყოფოში მოათავსეს.

ბაზრობა სადაც შემთხვევა მოხდა, ბერლინში ბრაიდშაიდპლაცზე, მთავარ სავაჭრო ქუჩის დასავლეთით მდებარეობს.

სამართალდამცავებმა მანქანის სავარაუდო მძღოლი დააკავეს. ის სავარაუდოდ პაკისტანელი ლტოლვილია, რომელიც გერმანიაში 2016 წლის თებერვალში ჩავიდა. მანქანაში აღმოაჩინეს ასევე გარდაცვლილი ადამიანი, რომელიც პოლონეთის მოქალაქეა. სწორედ, მის სახელზე იყო გაფორმებული მანქანის დოკუმენტაცია.

აღსანიშნავია, რომ სატვირთო მანქანა პოლონურ კომპანიას ეკუთვნის. კომპანიაში აცხადებენ, რომ მძღოლთან კავშირი ტრაგედიამდე რამდენიმე საათით ადრე დაკარგეს.