რას იხსენებს ფოტოგრაფი, რომელმაც რუსეთის ელჩის მკვლელობის წუთები ფირზე აღბეჭდა

მსოფლიო - 14:10, 20 Dec, 2016

36053

მეორე დღეა სრულიად ინტერნეტსივცრე თურქეთში რუსეთის ელჩის მკვლელობას განიხილავს. ვრცელდება კადრები, ფოტოები...

ელჩის მკვლელის ცნობილი ფოტო Associated Press -ის ფოტოგრაფს ბურჰან ოზბილიცს ეკუთვნის, რომელიც მუზეუმში იმყოფებოდა ელჩის სიტყვით გამოსვლისას.

ფოტოგრაფი ელჩის მკვლელობის წუთებს იხსენებს:

„არ დაივიწყოთ ალეპო. არ დაივიწყოთ სირია! ყვიროდა შეიარღებული მამაკაცი თურქულად. ის ასევე ყვიროდა "Allahu akbar”, თუმცა სხვა ვერაფერი გავიგე, რადგან რაღაცას არაბულად ამბობდა.

ოფისიდან სახლში მივდიოდი და გადავწყვიტე დავსწრებოდი გამოფენას სახელწოდებით „კალინინგრადიდან კამჩატკამდე, მოგზაურის თვალით ", რადგან მუზეუმი გზად იყო. როდესაც მივედი, სიტყვით გამოსვლები უკვე დაწყებული იყო.

როცა რუსეთის ელჩმა საუბარი დაიწყო, გადასაღებად მივუახლოვდი, რადგან ვიფიქრე, თურქეთ-რუსეთის ურთიერთობასთან დაკავშირებულ ამბებზე ფოტო გამოგვადგებოდა.

ელჩი გულთბილად საუბრობდა და შემიძლია გითხრათ, რომ სამშობლოს სიყვარულით იხსენებდა, თან პერიოდულად ჩერდებოდა, რადგან თარჯიმნის თურქულ თარგმანს ელოდა.

უეცრად, სროლა ატყდა, რასაც პანიკა მოჰყვა.

ელჩის სხეული იატაკზე აღმოჩნდა, მის გარშემო სისხლის გუბე იდგა.

რამდენიმე წამი დამჭირდა იმის გასააზრებლად, რა მოხდა: ადამიანი ჩემ თვალწინ მოკვდა, სიცოცხლე ჩემი თვალების წინ გაქრა.

შოკირებული ვიყავი, მაგრამ შემდეგ დასისხლიანებული კედლის გადაღება დავიწყე.

მკვლელი ელჩის გარჩემო წრეებს ხაზავდა, ფოტოებს ხელს კრავდა და ყვიროდა.

რა თქმა უნდა ვიცოდი, რომ საფრთხე მელოდა, ვფიქრობდი : „მე აქ ვარ. იმ შემთხვევაშიც კი რომ დავიჭრა, არ მოვკვდე, ჟურნალისტი ვარ. ჩემი საქმე უნდა გავაკეთო. შემიძლია ავდგე და გავიქცე ფოტოების გარეშე... მაგრამ რა ვუპასუხო ხალხს, როდესაც მკითხავენ, რატომ არ გადავიღე ფოტოები.“

ვფიქრობდი ჩემს მეგობრებსა და კოლეგებზე, რომელიც კონფლიქტის ზონებში დაიღუპნენ.

თავდამსხმელი კი ყვიროდა და უცნაურად კარგად აკონტროლებდა საკუთარ თავს. ის ყველას გვიყვიროდა, რომ უკან გავწეულიყავით. შემდეგ დაცვამ ოთახი დაგვატოვებინა.

სასწრაფოები სწრაფად მოვიდნენ და პოლიციამ ოპერაცია დაიწყო. თავდამსხმელი მოკლეს.

როდესაც ოფისში დავბრუნდი და ფოტოების დათვალიერება დავიწყე, შოკში ვიყავი. ჩემს ფოტოზე , შეიარაღებული პირი ელჩის უკან იდგა, როგორც მეგობარი ან პირადი მცველი, მაშინ როდესაც ელჩი სიტყვით გამოდიოდა და ის მის მოსაკლავად ემზადებოდა.

შეგახსენებთ, თავდასხმა ანკარაში, ფოტოგამოფენის გახსნაზე მოხდა, სადაც თურქეთში რუსეთის ელჩი ანდრეი კარლოვი სიტყვით გამოდიოდა. მას ზურგიდან ესროლეს. გავრცელებული ცნობით, მკვლელი ანკარაში პოლიციის ოფიცერი, 22 წლის მევლუთ მერთ ალტინტასია, რომელიც სამართალდამცავებმა მოკლეს. გასროლის შემდეგ მისი სიტყვები იყო: "ჩვენ სირიაში ვიხოცებით, თქვენ აქ დაიხოცეთ."

თავდასხმა უკვე შეფასდა ტერორისტულ აქტად. მკვლელობის შემდეგნ რუსეთ-თურქეთის პრეზიდენტებს შორის სატელეფონო საუბარი შედგა. ორივე პრეზიდენტმა დააფიქსირა, რომ ეს პროვოკაციული ქმედებაა, რომელიც ორი ქვეყნის ურთიერთობის ნორმალიზაციის წინააღმდეგ არის მიმართული.